Nongpoh, Jymmang 01
Ki pulit jong ka thanat Patharkhmah ha ka step phyrngab jong ka sngi Palei, ki la ïoh ban kem noh ïa ki lai ngut ki nongtuh umphniang ‘diesel’ na ki lai tylli ki Mobile Tower jong ka kompeni Reliance Jio kaba don ha ka thaiñ Patharkhmah.
Katkum ka tyllong khubor na ki pulit, la ïathuh, ïa kitei ki lai ngut ki nongtuh, la ïoh ban kem na kawei ka kali Maruti 800 kaba don ïa u registration number ML10-D-2859 ha ka por kumba 3 baje eiei jong ka 1 tarik u Jymmang, 2025 na lad PWD Patharkhmah ryngkat bad 6 tylli ki khilon jri kiba la thep ïa ka umphniang diesel kaba don kumba 220-230 litar.
Kitei lai ngut ki nongtuh kiba la shah kem ki dei kiba la tip kyrteng kum u Refer Marsing na ka shnong Mawtari Thaiang, u Robren Langi bad u Rishad Sylliang pat kiba dei na ka shnong Umkra. Kine baroh lai ngut ki la phla halor ka jingdonkti bad katei kam tuh bad na ka liang ki pulit ki suba jur ruh ba kine ki briew ki dei kiba la donkti teng ban leh ïa kum kine ki kam tuh ha kiwei de ki bynta jong ka district.
Halor kane ka bynta, na ka liang ki pulit ki dang pynlong ïa ka jingtohkit ban lapdien shuh sa ïa kiwei de kiba donkti ha kane ka kam tuh kam thiem. Ki bor pulit ki la ai khublei ruh ïa ki paidbah kiba la ai jingtip biang por halor kane ka jingjia ban ïoh kem ïa kitei ki nongtuh.
