Shillong, Jymmang 01
Iwei i khyllung ba dang shu kha, i la shah ieh noh ha ka kmie ha kawei na ki dukan die waidong kaba don hajan ka Shillong Civil Hospital.
Katkum ka jingpyntip ba la ai da ka District Child Protection Officer jong ka East Khasi Hills, la ong ba ine i khyllung ba la shah ieh ha katei ka dukan waidong i dei i kynthei.
Katkum ka jingïathuh la ong ba ïa ine i khyllung la ieh ha katei ka dukan ha ka por kumba 5:30 eiei mynstep bad mynta ine i khunlung i don hapoh ka jingsumar bad jingïada jong ka Lawei Baphyrnai, Specialised Adoption Agency, Shillong.
Ka District Child Protection Officer ka pyntip ba kino- kino ki briew ne bahaïing kiba don jingtip kiba long kumno-kumno ruh haba ïadei bad ine i khunlung ba kin phone sha ka ophis ka District Child Protection Unit, East Khasi Hills ha u number 0364-7962188 lane ka ophis ka Child Welfare Committee, East Khasi Hills ha u number 0364-7962188 lane ka Lawei Baphyrnai Specialised Adoption Agency, Lumsohphoh, East Khasi Hills ha u number 9612168593.
La ong ba kin pyntip hapoh ka 60 sngi naduh ka sngi ba pynmih ïa kane ka jingpynbna lem kumta yn ñiew ïa ine i khunlung iba laitluid ban ai ting.
