Shillong, Jymmang 01
Ka Kynhun Myntri jong ka Sorkar Jylla ha ka sngi Palei ka la mynjur ban kyntiew kyrdan noh ïa 6 tylli ki skul Secondary ka Sorkar sha ki skul Higher Secondary bad ban wanrah ruh ïa ki laiñ (Stream) pule thymmai ha ki 11 tylli ki skul Higher Secondary.
Haba kren bad ki lad pathai khubor ha ka sngi Palei, u Myntri bad Nongaiktien ka Sorkar, Bah Paul Lyngdoh u la ong ba baroh 6 tylli ki skul Secondary jong ka Sorkar kin kiew kyrdan noh sha ki Higher Secondary bad 11 tylli ki skul ki bym pat don ïa katto-katne ki laiñ pule, kin ïoh mynta ïa kine ki laiñ ban pule.
U la ïathuh ba ka jinglut jingsep ba ka Sorkar ka hap ban buria na ka bynta ban wanrah ïa kine ki laiñ pule thymmai, bad ka jingkyntiew kyrdan ïa ki skul Sorkar kan long kumba T.10 klur shisnem.
U Bah Paul u la ïathuh ba ïa kane ka rai la shim hadien ba ka don ka jingduna ha ka jingpynrung klas ha ka kyrdan pule klas XI, kaba long tang 12,000 bad ruh ka jingbun palat kiba leit pule ha ki skul Higher Secondary khamtam ha ki jaka sor ha Khasi bad Jaiñtia.
“Ka jingkyntiew kyrdan ïa kine ki skul kan ïarap ban pyndap ïa kane ka jingduna da kaba yn lah ban pynrung klas noh mar-mar sa 9000 ngut ki khynnah,” la ong u Myntri.
Ki 6 tylli ki skul ki ban shah kyntiew kyrdan sha ka Higher Secondary ki long ka Rymbai Secondary School, Umthlong-Nongthliew Secondary School, Nongtalang Secondary School, Tirot Sing Memorial Secondary School, Laitkynsew, Tura bad Jowai Public School.
Ha kaba ïadei bad ka jingmynjur jong ka Sorkar ban wanrah ïa ki laiñ (Stream) pule thymmai ha ki katto-katne ki skul Higher Secondary, u Bah Paul u la ïathuh ba kine ki laiñ pule ki long ka laiñ pule Science ha Tirot Sing Memorial Govt Higher Secondary School, Nongkhlaw, ka laiñ pule Commerce ha Govt Boys Higher Secondary School, Tura, Dalu Govt Secondary School, West Garo Hills, Baghmara Higher Secondary School, Govt Boys’ Higher Secondary School, Jowai bad ha Sohkha Govt Higher Secondary School.
“Ïa ka laiñ pule Arts ngin wanrah ha Jirang Higher Secondary School, Ri Bhoi, Resubelpara Higher Secondary School, Maharam Higher Secondary School, Mawkyrwat. Ïa ka laiñ pule Science bad Commerce ngin wanrah ha United Kharkutta Govt Higher Secondary School, North Garo Hills, Malangkona Higher Secondary School,” la ong u Myntri.
