Jowai, Jymmang 01
Ka Seiñraij Kongwasan Chyrmang ka dei kawei na ki raij kaba pynlong nyngkong eh ïa ka Behdienkhlam hapoh ri Jaiñtia. Kumta ha ka 1 tarik Jymmang la pynkut noh ïa kane jinglehniam hapdeng ka jingitynnad jong ka mariang.
Kane ka lehniam Behdienkhlam ka la sdang da kaba u Langdoh Kongwasan Chyrmang ryngkat kiwei ki shakri niam ka raij ki la pyndep ïa ka bynta jong ka lehniam haduh ban da poi ka sngi khatduh jong ka lehniam Behdienkhlam.
Ka Behdienkhlam ba la pyndep da ka Seiñraij Kongwasan Chyrmang ka dei ka jinglehniam ha shwa ba ki khun ka raij kin hiar sha ki hali ki pyntha ban pynhap ïa u symbai u rynai, ban bha ban miat u kba u khaw ban dap ban biang ka ïing ka sem bad ban beh ïa ka khlam ka ngoh napoh ka shnong ka raij.
Ki rukom ka lehniam ne kñia ainguh kiba la pyndep da ki shakri niam ka Raij ki long Thang blai, Thoh Langdoh knia Ryngkaw, Hat Khrong, ka Kamcharoh blai, Chad Ïung thyndai, Boh Synrum.
Katba ha ka 1 tarik Jymmang ki rukom lehniam la pyndep ki long ka Chad Thyndai, Seh Bhang ha Khloo blai ryngkat ka nguh ka dem ka suit ka shor, ka jingshad ha Ïung Langdoh, ka jingpynkhein ‘Khnong blai’, ka jingpynhiar ïa ki ‘Charoh blai’ sha Aitnar.
Ki rot baroh ki long 7 tylli ba la wanrah da ki dong ba kynthup ka Bangla, Iapmuid, Chyrmang wah, Chyrmang nein, Wah biar -B, Lumbuh ja, bad Iongnohiap-lashait, hapdeng ka jingkynud ki sur jong ka bom ka bhuri bad la pynphuh pynphieng bad pynshongshit ïa ka shad Behdienkhlam da ka jingïashim bynta lang ruh ki khun samla kynthei ha ka riam ka beit ba bun rukom.
Nalor ki khun ka Seinraij Kongwasan Chyrmang, la wan ban sakhi ruh da u MLA ka thaiñ Ma Lakhmen Rymbui, Dolloi ka Elaka Jowai Ma Puramon Kynjing, nalor kiwei kiwei ki nongïalam na ki Seiñraij bapher bapher ha ka jingïalang kaba la pynïaid da u President ka Seiñraij Kongwasan Chyrmang Ma Ker Lakiang.
Hadien ba la bret ïa ki rot la pyndep ruh ïa ka lehniam Ïadaw Charoh.
