Agartala, Jymmang:
Kum ka jingpyntreikam hadien ba la ïoh ïa ka jingtip kaba bniah, ki shipai Border Security Force (BSF) kiba la pynkhreh bha ki la ïohkem ïa lai ngut ki nong Bangladesh ryngkat ar ngut ki nongkhaïi kiba dei ki nong India ha steshon rel Teliamura ha Tripura ha ka por kumba 11:30 baje mynstep jong ka sngi Ba-ar.
Kane ka kynhun ka la lap ïa kine ki briew katba ki dang pyrshang ban rung ha ka rel Agartala-Silchar.
Katkum ki tyllong khubor na ki BSF, kitei ki khar Bangladesh kiba la shah kem ki dei kiba wan na Lakargaon kaba hap hapoh jong ka Chunarugat Police Station ha Habiganj distrik jong ka Sylhet Division, Bangladesh.
Nalor kane ka jingshah kem kaba khraw, ki shipai BSF Tripura ki la pynlong bun tylli ki jingkhynra ha khappud Indo-Bangladesh bad ki la jop ban pynthut ïa ki katto katne ki jingpyrshang ban rung tuh sha shiliang khappud.
Kine ki jingtrei ki la pynlong ban kurup ïa ki mar ba la khang pyrshah kiba shongdor kumba 4 lak tyngka.
Ki BSF ki la pynjur ïa ka jingpeitngor jong ki ha shilynter u pud u sam jong ka pyrthei ban ïaleh pyrshah ïa ki jingma kiba ïai bteng jong ka jingwan rung tuh bad ki kam runar shabar pud.
Ki heh jong ka tnad pahara ki la pynskhem biang ïa ka jingkular jong ki ban pynneh ïa ka jingsuk bad jingshngaiñ ha ki jaka khappud lyngba ka jingpynkhreh ïa ka jingpeitngor bad ka jingtreikam kaba stet.
