Uppsala, Jymmang:
Katkum ki khubor, la iathuh ba 3 ngut ki la khlad noh hadien ka jingjia synreit kuli ha ka nongbah Uppsala jong ka Sweden ha ka Sngi Ba-ar. Na ka liang ki pulit ki dang wad bniah ia ka daw jong katei ka jingjia ha katei ka sngi ban lap la ka don jing-iadei ne em bad ki kam thombor lehnoh ne kino- kino ki kynhun runar.
Ki pulit ki iathuh ba ki dang buddien bad tohkit ban lap ia kito kiba donkti bad ka daw jong katei ka jingjia ha katei ka sngi. Nangta ki la ioh jingtip ba u suba donkti ha katei ka jingjia u la phet krad noh da ka thuk-thuk ilektrik. Pynban na ka liang ki pulit kim pat lah ban pyntikna la utei u briew uba phet u dei uba don kti ne uba shu phet krad namar ka jingsheptieng ia kaei kaba u la iohi bad sakhi ha katei ka jingjia. Kumta kin dang hap ban buddien ia u bad ban tohkit bniah ruh lyngba jong u ynda ki la ioh ban iakren bad u.
Ia mynta ki pulit kim pat lah ban pynithuh kyrteng ia kitei kiba khlad bad kin sa ai jingpynshai hadien ynda ki la ioh ban peit bniah bad peit thuh bha ia kiei- kiei baroh.
Namar la ong ba ia ki thuk-thuk ilektrik lane ki ‘Electric Scooter’, la ju pyndonkam bha da ki runar ban ioh phet krad hadien ba ki la dep leh ia kano- kano ka kam runar ne ka kam thombor namar ki long kiba suk bad ba kloi ban ioh phet.
Ka nongbah Uppsala jong ka ri Sweden, ka jngai tang kumba 40 minit eiei na ka nongbah Stockholm lada leit da ka kali, bad kane ka nongbah ka long kaba ma haduh katta bad kaba ki kam runar bad ki kam thombor ki long kiba khah- khah mynta da ki phew snem.
U Myntri ka tnat aiñ jong ka Sweden, u Gunnar Strommer u la ong ruh ba ka tnat aiñ jong ka ri, ka dang iatreilang bad ki pulit ban wad bniah haba iadei bad kane ka jingjia khlem da pynslem ne buhteng ban lap noh ia ka daw bad kiba don kti baroh bad ba yn pynngat ruh hapoh ki kyndon pynkheiñ aiñ katkum ki jingleh pynkheiñ aiñ jongki hi.
Ki pulit ha katei ka sngi, ki iathuh ba ki la ioh ia ka phone na ki paidbah ha katei ka thaiñ ba ki pyntip halor ka jingiohsngew ia ka jingriew ki ktang suloi bad tang mar kumta hi ki pulit bad ki tnat iarap ki la leit her mar-mar sha katei ka jaka.
Hynrei ha ka por ba ki poi ha katei ka jaka, la lap ia kitei ki 3 ngut kiba la dep thiah iap lypa bad kim lah shuh ban leh eiei ne ban iarap pynim ia ki.
Namar ka Sweden ka long ka ri kaba ju sakhi bha ia ki kam runar bad ki kam thombor jong ki kynhun runar da ki phew snem mynta.
