Shillong, Jymmang 01
Ka Khasi Student’s Union (KSU) ha ka 1 tarik u Jymmang, 2025 ka la leit ban tur kynsan puk sha NEIGRIHMS ban pynpaw ïa ka jingpyrshah halor ka rukom khot thungkam-thungjam hapoh katei ka jaka kaba long khlem da pyrkhat lang ïa ki samla trai ri-trai muluk.
Kane ka jingleit tur kynsan ka KSU ha ryngkat ka jingrah ïa ki jingthoh ban leit shong kyllaiñ mongor hakhmat ka Administrative Block jong ka NEIGRIHMS ka long ban pynpaw ïa ka jingpyrshah halor ka jingïai sahteng ki mat jingdawa jong ka seng kiba kynthup ïa ka jingdawa ban pynjlan ïa ka rta thungkam nos na ka 30 snem sha ka 35 snem da kaba kdew ba kam shym la don ka jingpynrung kam haduh ar snem kynthih namar ka jingwan lynshop ka khlam COVID-19, kaba la wanrah ïa ka jingduhnong, ka jingbud pyrkhing ïa ka 80:20 ka jingkheiñ ki kynthei bad shynrang na ka bynta ki nursing ophisar, kumba la bud ha AIIMS bad kiwei kiwei ki jaka sumar da kaba kdew ba 190 tylli ki kam na ki 200 tylli ki kam ha ka por ba thungkam kham mynshwa la mang sha ki kyrtong shynrang, bad kine baroh ki dei kiba wan na Rajasthan.
Shuh-shuh, ki mat jingdawa ka KSU ki kynthup ruh ïa ka jingkhot thungkam kaba long pyrshah ïa ka Scheduled Tribe Reservation Policy ha kaba na ki 105 ngut ki kam Nursing Officer, katei ka jaka ka la bhah tang 2 tylli ki seat na ka bynta ki Scheduled Tribe nalor kiwei-kiwei ki mat jingdawa.
Ka KSU ha ryngkat ka jingrah ïa ki placard bad ki sur jingpyrta “Step Down Director” ka la leit beit-beit sha katei ka jaka bad dawa ban hiar shuki mardor ïa u Director ka NEIGRIHMS, Dr. Nalin Mehta u bym lah satia ban pynbeit ïa ka rukom thep kam hapoh katei ka jaka.
Wat hapdeng ka jingther jong u ‘lapbah-‘lapsan ha katei ka sngi, ki nongïalam bad ki dkhot ka seng ki khlem khih satia bad ki la pyneh beit triang ban shong ha katei ka jaka.
Ha kitei ki placard ba la rah da ka seng la thoh shai ba “Ka jingleh mynthi jong u Director ka dei ka jingbym kheiñ snep ïa ka jaidbynriew jong ngi”, “Ko Sorkar Jylla, wat ai daw ba phim lah ban tuklar namar la bynshet ïa ka bor ha phi ba phi hap ban tuklar”, “U Dr. Nalin Mehta (Director) u dei u nongthok nongshukor bad u nongpynjot ïa ka NEIGRIHMS” nalor kiwei-kiwei ki jingthoh.
La sakhi ba ha kane ka jingleit jong ka seng, ki la don lypa ki pulit Special Operation Team (SOT) kiba la syrtap ha katei ka jaka.
Hadien katto-katne por eiei, la wan mih ruh da ki majistor ban ïakren bad ki nongïalam ka KSU ha kaba ka jubab kaba la mih na ka liang ki nongïalam ka seng ka long ba kim treh satia ban mih napoh katei ka jaka katba kim pat ïoh ïa ka jubab kaba biang bad ong ba lada kim ïoh ïa ka jubab, kin shong bad kim nym khih satia na katei jaka ka shong.
Ka KSU ka la kren da kaba shai sha ki bor majistor ba kin phah mih ïa u Director ka NEIGRIHMS, Dr. Nalin Mehta shabar ban ïakren markhmat bad ka seng bad bynrap da kaba ong ba kane ka jingpynslem jong u Dr. Nalin Mehta ban ai ïa kano-kano ka jubab halor kane ka jingdawa ka seng, ka dei tang ka buit sianti jong u Director khnang ba kane ka jingpynbna khot thungkam-thungjam hapoh katei ka jaka kan poi noh sha kaba kut.
Ka seng ka la kren da kaba shai ruh ba ka jingwan shong kyllaiñ mongor kam dei ban wan pynkulmar hapoh katei ka jaka sumar hynrei ka dei ha ka rukom kaba long jai-jai da kaba bynrap ruh ba kane ka jingdawa ka seng ka dei kaba la neh la slem bha.
