Shillong, Jymmang 01
Ka tnat ïalehkai jong ka Sorkar Jylla ka la sam baibam (scholarship) sha ki nongïalehkai kiba la wanrah burom ïa ka jylla lyngba ka Chief Minister’s Sports Scholarship Scheme 2024-25 ha ka sngi Palei ha State Convention Centre, Shillong.
Ha kane ka sngi la ïadonlang u Myntri Rangbah ka Jylla u Conrad K. Sangma kum u kongsan kumjuh u Myntri ka tnat ïalehkai u Bah Shakliar Warjri kum u symbud kongsan, u Director ka tnat ïalehkai u D.D Shira, u Working President ka MSOA u Bah John F Kharshiing bad kiwei kiwei.
Ha kane ka sngi la sam baibam sha baroh 614 ngut ki khynnah ïalehkai jong 27 tylli ki jait jing-ïalehkai bapher bapher ha ka jinglut kaba T. 5,24,98,500. Kine ki jingïa-lehkai ki kynthup ïa ka Archery, Arm Wrestling, Athletics, Badminton, Basketball, Bodybuilding, Boxing, Chess, Cycling, Football, Futsal, Jeet Kune Do, Jiu Jutsu, Judo, Karate, Kettlebell, Kickboxing, Mix Martial Arts, Muay Thai, Traditional Wrest-ling & Pankration, Pencak Silat, Power Lifting, Shooting, Table Tennis, Taekwondo, Wrestling bad ka Wushu.
Ha ai jingkren ha kane ka sngi u Conrad u la kam ba ki kam ïalehkai ki la sdang ban kiew shaphrang naduh ki hynñiew snem shaneng hapoh ka jingïalam ka Sorkar MDA kaba la pyrshang ban kyntiew ha ki song jingïarap pisa sha ki nongïalehkai kiba la wanrah burom ïa ka Jylla ha ki lympung ïalehkai hapoh ka ri (national) bad wat shabar ri ruh.
“Nga kynmaw ha u 2018 kiba bun ki synjuk ïalehkai bapher bapher ki la wan ïakynduh ïa nga hapoh ka jingïalam u Working President ka MSOA, Bah John F. Kharshiing ha kaba ki la pynpaw ïa ki jingeh ha kaba ïadei bad ki jingbym biang ha ka liang ki lad ai jingïarap sha ki nongïalehkai.”
“Kawei kaba ki la pynpaw ka long ba ym don ïa ka Sports Policy ha ka Jylla. Ki jingsam khusnam sha ki nongïalehkai kiba la khur takma ïa ka Jylla ha ki lympung ïalehkai National Level ki long kiba duna bha. Ki synjuk ïalehkai bapher bapher kim shym la ïoh ki lad jingïarap na ka Sorkar ha kito ki por kiba la leit bad ka long kaba eh ba kin ïoh ïa ki lad jingïarap na ka Sorkar ban pynlong ïa kino kino ki lympung ïalehkai bapher bapher,” u la bynrap.
U Conrad u la ong ba ka Jylla ha kito ki por kam long kaba biang ha ka jingdon ïa ki jaka ïalehkai kiba biang bad wat ka Meghalaya Games ha ki 48 snem la lah ban pynlong tang ar sien.
Ha kawei pat ka liang u Bah Shakliar u la pynpaw ka jingïaroh ïa kane ka sorkar MDA kaba la lah ban pynurlong ïa ka Jylla ba kan ïoh pynlong ha ka sien kaba nyngkong eh ïa ka National Games ha u snem 2027. Te kumta u la kyntu ïa baroh ki khynnah ïalehkai ba kin nang ïai trei shitom nangne shakhmat khnang ba kin ïoh ban shim bynta ha ka National Games bad ruh ban khur takma ïa ka Jylla.
Ha kajuh ka por u Bah Warjri u la pynpaw ba lyngba ka jingtrei shitom kane ka sorkar MDA ki la don palat 25 tylli ki madan artificial turf ha kylleng ka Jylla.
