Shillong, Jymmang 01
U samla Reuben Najiar uba dei Chairman ka KSU Employment Moni -toring Cell, u la ong ba ka jingleh bym suitñiew bad ka jingleh kyllut jong u Director ka NEIGRIHMS, u Dr. Nalin Mehta ban sngap ïa ki jingdawa ka seng halor ka jingdawa ban pynbeit ïa ka rukom khot thungkam-thungjam hapoh ka NEIGRIHMS ha ryngkat ka jingphah da ki jingthoh sha ka Sorkar Jylla, ka Sorkar Pdeng bad sha ar ngut ki MP ka Jylla kiba la ai da ka jingthoh sha utei u Director ka long kaei-kaei kaba pynbitar shikatdei eh ïa ka seng.
Ka seng ha ka 1 tarik u Jymmang, 2025 ka la leit ban tur sha NEIGRIHMS ha ryngkat ka jingrah ïa ki ‘placard’ ban leit shong kyllaiñ mongor hakhmat ka Administrative Block kum shibynta ban pynpaw ïa ka jingpyrshah halor ka jingïai sahteng ki mat jingdawa jong ka seng haba ïadei bad ka rukom khot thepkam-thepjam hapoh katei ka jaka.
Haba ai jingkren lyngkot ha katei ka sngi, u samla Reuben u la ong ba wat la u Director ka NEIGRIHMS u don hapoh katei ka jaka hynrei u la kyntait ban ïakynduh bad ban ïakren markhmat bad ka seng hynrei u la phah pynban ban ïakren bad u Deputy Director.
U samla Reuben u la ong ba kam myntoi ban ïakynduh bad ban ïakren bad u Deputy Director namar ba um don ïa ka bor ban shim rai eiei halor kane ki jingdawa ka seng.
U samla Reuben u la ong ba kane ka jingdawa ka seng ka dei ka jingdawa na ka bynta ka hok jong ka jaidbynriew bad ong ba utei u Director u don ïa ka mynsiem ban isih ïa ki paradoh-parasnam kiba dei ki ri-trai muluk.
“Kine ki jingdawa ki dei na ka bynta ka hok jong ka jaidbynriew hynrei une u Director kumba la ïohi, u don ïa ka mynsiem isih ïa ki para Khasi jong ngi”, ong u samla Reuben.
Shuh-shuh, u samla Reuben u la ong ba ka seng kan ym ailad da lei-lei ba kum utei u jait briew un wan ban pynpharia bad ban pynduhjait ïa ka jaidbynriew.
U la ong ba kine ki jaka sumar bad jaka treikam kiba wan na ka Sorkar Pdeng ki peit poh ïa ka jaidbynriew baroh kawei bad ong ba ka NEIGRIHMS ka dei ka jaka sumar kaba don hapoh kane ka Jylla, kumta kam ïahap ba ïa ka bhah bad ka hok jong ki khun samla kiba dei ki paradoh-parasnam yn shah lehkai bad shah pynduhnoh.
Na ka liang ka seng kala shim da kawei ka rai ba katba utei u Director um pat treh ban mih shabar bad ban ai jingpynshai halor ka jingbym lah jong u ban pynurlong ïa kine ki mat jingdawa, ka seng kan shong beit ha katei ka jaka.
Wat hapdeng ka jingshong kyllaiñ mongor bad ka jingïai ap ka seng da ki kynta hapdeng ka jingther u ‘lapbah ïa ka jingwan mih jong u Director ka NEIGRIHMS, u Dr. Nalin Mehta shabar ban ïakren bad ka seng hynrei la ïoh jingtip pat ba utei u Director u la mih nadien ka kamra treikam jong u bad phet bak na katei ka jaka.
Na ka liang ka seng kala kren da kaba shai ruh ba kan nym khih satia na katei ka jaka tad haduh ba utei u Director un pynurlong ïa ki mat jingdawa ka seng hynrei kane ka jingphet krad jong u Director nadien bad ka jingbym nud jong u ban wan mih hakhmat ka seng ban pynshai ka long kaei-kaei kaba la pynsat sia bad pyndom shikatdei eh ïa ka seng.
La sakhi ruh ba ha ka por ba la miet na ka liang ka seng ka la wanrah da ki jaiñ siang thiah ban thiah hapoh ka phyllaw jong katei ka jaka sumar bad ban pynkhreh ban sah miet syndon ha katei ka jaka katba kim pat ïoh ïa ka jubab kaba biang na ki bor pynïaid katei ka jaka sumar.
