Nongstoiñ, Jymmang 01
Ha ka Sngi Balang jong ka taïew, ka Nongstoiñ Civil Hospital ka la ïoh ban plie sa ïa ka Intensive Care Unit (ICU) na ka bynta ban sumar bniah ïa ki nongpang kiba la shitom jur.
Ïa katei ka ICU jong ka Civil Hospital Nongstoiñ la plie da u MLA ka Nongstoiñ, Bah Gabriel Wahlang kum kongsan ha ka jingdonlang u Bah V Swer, ADC ka WKHD, u Medical Superintendent katei ka hospital, Dr. HR Sohkhlet, ka Dr. W Langbang, ka Dr. M Sohliya, DMHO, Dr. B Myrthong Medical Specialist bad kiwei kiwei ki nongtrei katei ka hospital.
La ïathuh ruh ba katei ka ICU ka dei kaba don san jingthiah kynthup ïa ki rangbah bad na ka bynta ki khyllung bad ruh ba la sdang ban buh nongpang hapoh ICU naduh ka taïew ba khatduh jong bnai Rymphang, 2025 bad haduh mynta kiba thiah pang ha ICU kila don kumba 60 tam.
U Bah Gabriel Wahlang, MLA u la ai ka jingïaroh ïa ki doctor bad ki nurse lem bad ki nongtrei ka Civil Hospital kiba la trei shitom na ka bynta ka koit ka khiah u paidbah.
Shuh shuh u la ong ruh ba un sa ïatrei ryngkat lang bad ki bor pynïaid ka hospital ban nang lah shuh shuh ban pynbiang ïa kiba bun ki jingdonkam.
Na ka liang u Dr. W Langbang, uwei na ki doktor ba trei hapoh ka Civil Hospital Nongstoiñ haba ai jingkren ha ka jingïalang plie ïa ka Intensive Care Unit (ICU) u la ong ba ka jingdon jong ka ICU ka la long ka jingmyntoi bad jingkyrkhu ïa ki duk ki suk ki bym lah ban leit phah sumar sha Shillong.
Shuh shuh u la ong ruh ba ki nongpang katba dang mih ki sngi ki dang ïai bun hynrei ki doctor bad ki nurse ki sah kumjuh bad kane ka la wanrah jingeh ïa ki doctor bad ki nurse ban treikam namar teng teng uwei u doctor u hap peit ïa jan baroh ki jingdonkam hapoh ka hospital kaba la pyndkoh ruh hateng ïa ka jingtreikam kaba kam ruh sha ka jingshah kynthoh kaba la mih ruh wat sha ki lad pathai khubor ba ka Civil Hospital Nongstoiñ kam biang.
U la ong ruh kam dei ba ki doctor ne ki nurse kim shimkhia ïa ka kam hynrei ka dei namar ba ka kam ka la teh bad ka la khia haduh katta katta namar ka jingduna ki nongtrei bad ka jingdon jong katei ka ICU ruh kam mut pat ba ka la biang lut nadong shadong hynrei dang bun ki jingdonkam ban dang hap ban pynbiang. Kumta u la kyrpad ïa u MLA bad ki heh ophisar ka district bad jong ka koit ka khiah ba kin peit lem ïa ki jingdonkam hapoh jong katei ka hospital.
