Shillong, Jymmang 01
Ka jingthmu ban wanrah ïa ka Shillong Campus jong ka Captain Williamson Sangma State University ka la ïakynduh mawsiang, hadien ba ka jaka ba la thmu ban buh kaba dei ha Bijni Complex ka don hapdeng ka jingïakhun mukotduma ha ïingbishar namar ka jingïaknieh long trai.
U Myntri ba khmih ïa ka tnat Pule-Puthi ka Jylla, Rakkam A Sangma haba kren bad ki lad pathai khubor u la pynthikna ïa kane, ba ka Bijni Complex kaba ka Sorkar ka la ithuh na ka bynta ban wanrah ïa ka Shillong Campus, ka dang don hapdeng ka jingïaknieh katkum ka aiñ.
“Katba ka tnat ka dang pynkhreh bad ka kam ka dang ïaid na ka bynta ban pyndonkam noh ïa ka Bijni complex, ka la mih pynban ka jingïaknieh long trai ïa ka jaka bad ki la leit sha High Court,” la ong u Rakkam.
Katkum ka jingïathuh u Rakkam, ka North Eastern Hill University (NEHU) ka la leit sha High Court, da kaba pynpaw ba ka dei trai ïa katei ka complex.
U la ong ba ka NEHU ka la leit sha High Court ban pynksan ïalade ba ka dei ka trai ba shisha jong ka Bijni complex naduh ba la tei ïa ka, bad bynrap ba kane ka kam mynta ka don hapoh ka ïingbishar.
Namar kane ka jingdon mukotduma, na ka liang ka Sorkar ka la sdang ban peit noh sha kiwei ki jaka tang ban buh shipor ïa ka campus bad wad ruh ïa ka jaka ban long trai hi da ka Sorkar ban shna ïa ka campus ha Shillong.
“Ym dei tang ïa ka Bijni complex. Ngi la dep ïakren ruh bad ka tnat Urban Affairs ba kan ai jaka na ka bynta ka skulbah jong ka Jylla ha ka thaiñ Mawdiangdiang. Na ka bynta ban pyndonkam shipor, ngi dang peit ruh ïa ki ïing bad jaka khnang ba ngin lah ban sdang noh ïa ka skulbah ha Shillong campus kham kloi,” la ong u Rakkam, haba pyntip ruh ba ka tnat ka pyrshang ba la kumno-kumno ym wanrah ïa ka administrative office jong ka Shillong campus, katba dang wad ruh ïa ka jaka ba paka.
U Myntri u la ong ba na ka liang ka Sorkar kan sa thung Pro-Vice Chancellor noh shen na ka bynta ka Shillong campus, kumjuh ïa kiwei ki ophisar ba kham donkam ban sdang noh ïa ka kam kham kloi.
Na ka liang u Rakkam u la pyntip ruh ba ha ka sngi Thohdieng kin don ki jingïalang bishar kam ha ka skulbah kaba don ha Tura, ban bishar ïa ki kam jong ka skulbah bad ïa ki jingduna ha ka jingsdang pynïaid kam.
