Shillong, Jymmang 01
Ka Kynhun Myntri jong ka Jylla ha ka sngi Palei ka la mynjur ïa ka jingtyrwa ban pynkha ïa ka kyrdan Director ha ka tnat Civil Defence & Home Guard.
Haba pyntip ïa kane, u Bah Paul Lyngdoh uba dei u Myntri bad Nongaiktien ka Sorkar, u la ong ba ha ka Directorate of Civil Defence and Home Guard, ka Sorkar ka la rai ban pynkylla ïa ka Service Rules ban lah pynkha ïa ka kyrdan Director of Civil Defence kaba pynïaid mynta da u Commandant General ka Home Guard.
“Khnang ban lah pynjanai ïa ka jingtreikam jong ka Tnat Civil Defence bad Home Guard, ka kyrdan Director of Civil Defence kan long mynta kum kawei pat ka kam. Ngi la pynkha ïa kane ka kam khnang ban lah pynkiew kyrdan ïa ki Joint Director, kiba la shakri ym duna ïa ka 3 snem ba kin kiew sha ka kyrdan Director. Kane kan ai mynsiem ruh ïa ki ophisar kiba la don ka jingshemphang bad jingstad ha ka jingshakri jong ki hapoh ka tnat,” la ong u Myntri.
Ha kawei ka liang u Bah Paul u la pyntip ba ka Kynhun Myntri ka la mynjur ruh ïa ka Meghalaya Ayush Medical Service Rules, 2025.
U la ong ba ki rukom ai jingsumar tynrai kum ka Ayurveda, Homeopathy, Yoga, Naturopathy ki dei kiba la khring bha bad ba la jied da ki paidbah kum kawei pat ka rukom sumar ba mynta.
“Kumta, ka Sorkar ka la rai ban don noh ïa ka Service Rules bad yn khot ïa ka da ka Meghalaya Ayush Medical Service Rules, 2025,” la ong u Myntri.
