Guwahati, Jymmang:
U Myntri Rangbah ka Assam Himanta Biswa Sarma u la ong ba la kem ïa 30 ngut ki briew namar ba ki kyrshan ia ka Pakistan ha ki lad pathai khubor.
U la maham ruh ba kito kiba donkti kham bun ne kiba don ka histori lypa kin shah pynngat hapoh ka aiñ National Security Act (NSA).
“Ki don ki jingïasyriem hapdeng ka Bharat bad ka Pakistan”, la ong u CM ka Assam u Himanta Sarma.
Ki la don palat 30 ngut ki briew ki la shah kem ha Assam haduh mynta ka sngi namar ki jingthoh kiba la pynmih jingkulmar ha ki lad pathai khubor halor ka jingthombor jong ki lehnoh ha Pahalgam, kaba la pynïap ïa palat ar phew ngut ki riew paidbah.
U Myntri Rangbah ka Assam u Himanta Biswa Sarma u la ong ba kitei ki jingkem ki dei namar ba ki kyrshan ïa ka Pakistan ha ki lad pathai khubor. U la maham ruh ba kito kiba donkti kham bun ne kiba don dak lypa ha ki kam sniew kin shah pynngat hapoh ka National Security Act (NSA).
“Kam don kano kano ka jingïasyriem hapdeng ka Bharat bad ka Pakistan. Ki ar tylli ki ri ki dei ki ri ba la ïashun, bad ngi dei ban neh kumta,” la ong u Sarma haba kren bad ki lad pathai khubor ha ka sngi Ba-ar.
Kham mynshwa, ym duna ïa ka 24 ngut ki briew, ba kynthup ïa u MLA, u nongthoh khubor, ki samla pule, u nongïasaid aiñ, bad ki nonghikai ba la shongthait, ki la shah kem ha Assam, Meghalaya, bad Tripura, namar ka jingthoh jong ki, kaba la pynmih jingkulmar ha ki lad pathai khubor, halor ka jingshah thombor ha Pahalgam.
U Aminul Islam, uba dei u MLA na ka All India United Democratic Front (AIUDF), u dei napdeng kiba nyngkong eh ban shah pynngat ha ki kam pynkhihwin, namar ka jingkren jong u, ba ka jingthombor ha Pulwama ha u snem 2019 bad ha Pahalgam, kaba dang shen, ki dei ki “jingïasuhbuit da ka sorkar.”
Ha ka sngi Ba-ar ba la dep, ki lehnoh ki la siat ha kawei ka khlaw kaba don hajan ka shnong jngohkai pyrthei kaba pawnam bha jong ka Pahalgam ha Anantnag distrik jong ka South Kashmir, ha kaba 26 ngut ki nongjngohkai pyrthei ki la ïap ryngkat ka lyngkieñ ka snam.
Ha kajuh ka por, u Myntri Rangbahduh ka ri, u Narendra Modi, ha ka jingïalang bishar bniah ïa ka jingïada kaba kongsan hadien ka jingshah thombor ha Pahalgam, u la ong ha ka sngi Ba-ar ba ki shipai ki don ïa ka “jinglaitluid kaba pura ban rai ïa ka rukom treikam, ki thong, bad ka por jong ka jingpynkhreh jong ki.”
