Shillong, Jymmang 01
Ka Kynhun Myntri jong ka Sorkar Jylla ha ka sngi Palei ka la mynjur ïa ka Vehicle Scrappage Policy, bad lyngba kane ka polisi yn die mar jot (scrap) noh ïa ki kali rim kynthup ïa ki kali Sorkar bad jong ki ‘riewshimet kumba la leh ha baroh kawei ka Ri.
Haba kren bad ki lad pathai khubor hadien ka jingïalang ka Kynhun Myntri, u Myntri bad Nongaiktien ka Sorkar, Bah Paul Lyngdoh u la ong ba lyngba kane ka polisi, haduh 13,000 tylli ki kali yn weng noh na ka jingïaid ha ki surok.
Katkum ka jingong u Bah Paul, ki jingmyntoi kiba ïoh lyngba kane ka polisi ka long ban ailad pynduna ïa ka jingpynmih tdem ba pynjaboh, pynduna ïa ka jingthied umphniang kali bad ban pynshlur ban shna tiar da ki kali rim ba la pynkylla mar jot.
“Ki jingmyntoi ba khraw na kane ka polisi ka long ban ailad ïa ka Sorkar ba kan pynduna ïa ka jingpynmih tdem ba jaboh, pynduna ïa ka jingthied umphniang kali bad pynshlur ban shna tiar da ki kali rim ba la pynkylla mar jot,” u la ong.
U la ïathuh ba tang ha Shillong kumba long mynta ki don kumba 2,76,262 tylli ki kali kiba la register, bud pat sa ka Tura bad Jowai.
Haba pynshong nongrim ïa ka ïoh ka kot jong ki briew ka Jylla, u Myntri u la ong, “Ngin leh ïa kane ka kam da kaba sdang weng shwa nyngkong ïa ki kali Sorkar kiba la dap 15 snem shaneng. Kumba 5000 tylli ki kali Sorkar kin hap hapoh kane ka Scrappage Policy bad yn sa weng noh ïa ki na ki surok. Ha kaba ïadei bad ki kali ba long trai da ki ‘riewshimet, ngi la rai ban pyntreikam shwa da kaba sdang nyngkong ïa ki kali ba la rim 35 snem shaneng, kiba don palat 8000 tylli.”
Katkum ka jingpyntip u Bah Paul ki don 5000 tylli ki kali Sorkar ban die mar jot bad 8000 tylli ki kali jong ki ‘riewshimet, ka ban long 13,000 tylli ki kali ba yn sa weng noh na ki surok katkum kane ka polisi.
