Shillong, Jymmang 02
U Chief Executive Member ka KHADC, Bah Shemborlang Rynjah u la pyntip ba ki MDC ka VPP ki la leit ban ïakynduh ïa u Lat ka jylla ban tyrwa ïa ka kyrteng u Bah Mathew Keneth Makdoh dkhot ka Voice of the People Party na Ribhoi ban long u MDC shu sieh ha KHADC.
Haba ïakren bad U Nongsaiñ Hima hadien ba la dep ïakynduh ïa u Lat ka jylla, u Bah Shemborlang u la ïathuh ba ki MDC ka VPP ki poi 16 ngut ban leit ïakynduh ïa u Lat ka jylla ban ai khublei ïa u hadien ba ka seng VPP ka la ïoh ban synshar marwei ha KHADC.
U don jingkyrmen ba u Lat ka jylla un mynjur ïa ka kyrteng u Bah Makdoh.
U la pynpaw ruh ba un ym ong eiei lada ka sorkar ka tyrwa da uwei pat ka kyrteng hynrei ka VPP ka don ka hok ban tyrwa sha u Lat ka jylla.
Kum ban shu pynkynmaw, u Bah Mathew Keneth Makdoh u dei kyrtong ka VPP na Nongpoh konstitwensi hynrei u khlem poi sha ka thong ha kane ka ilekshon MDC ba la dep namar ki paidbah ki la pynjop ïa ka Kong Rona Khymdeit na ka seng NPP.
Ka jingtyrwa ki MDC ka VPP ïa ka kyrteng u Bah Mathew Keneth Makdoh ka dei hadien ba la phah da ka seng VPP Sengkmie.
