Guwahati, Jymmang:
Ha ka jingpyrshang ba la ïatreilang ban pynkhlaiñ ïa ka jingpahara ha khappud bad ban ïada ïa ki jingshna jong ka lynti rel, ka Railway Protection Force (RPF) jong ka Northeast Frontier Railway (NFR) ka la sdang ban pynlong ïa ka jingpahara lang ha ki jaka ba sngewkhia bad ba ap jingma ha shilynter ka khappud India-Bangladesh.
Ïa kane ka jingpahara lang la pynlong ryngkat ka jingïatreilang bad ki pulit ka tnat Government Railway Police (GRP) bad ki shipai ka tnat Border Security Force (BSF). Ka jingpahara lang kaba dang shu sdang thymmai da ki RPF, GRP, bad ki BSF ka long ban pynkhlaiñ ïa ka jingpeitngor bad ban ïada na kino kino ki jingjia ba sniew ha ki lynti rel kiba ïaid hajan ki pud ki sam jong ki ri ka pyrthei.
Ki kynhun pahara ki don ka kamram ban buddien ïa ki bynta kiba lah ban shah ktah ban ïada na ka jingpynthut, jingwan rung tuh, lane kino kino ki jingma kiba lah ban mih na ka jingshngaiñ jong ki nongleit nongwan bad ki mar ki mata jong ka rel, la ong ki tyllong khubor.
Ki kynhun ki dang bishar bniah ruh ïa ka jinglong ba la pynkhreh jong ki rukom pynïada ïa ki lynti rel bad ban pynthikna ba ki lad jingïarap ha ka por ba shisha ki don ha ka jaka jong ki. Kane ka sienjam ka wan hapdeng ka jingsngewkhia kaba jur bha shaphang ki jingleit jingwan be-aiñ shabar pud, kumba la pynshisha da ki jingshah kem dang shen.
Hadien ka jinghap jong ka jingsynshar Sheikh Hasina ha Bangladesh ha u snem ba la lah, bun ngut ki nong Bangladesh ki la shah kem namar ba ki wan rung be-aiñ sha India ha ki steshon rel bapher bapher ha ka dong Shatei-Mihngi, hajan u pud u sam ka Bangladesh.
