Shillong, Jymmang 02
Ka Kong Ri-ïohlang Dhar ka la ïoh ban pdiang shisyndon da ka khusnam ‘Assistant Referee of the Year’ ba la ai da ka synjuk All India Football Federation, ha kaba kane ka dei artad ka sien ba nyngkong ba ka AIFF kan sam lem ïa kum kane ka khusnam sha ki referee bad kumjuh ki asst. referee kynthei jong ka ri.
Ïa kane ka khusnam ka Kong Ri-ïohlang ka la ïohpdiang mynta ka janmiet (sngi thohdieng), ha ka jingïalang kaba la long ha Bhubaneswar.
Nalor ka Kong Ri-ïohlang, kiwei pat ki referee ba la ïohpdiang ïa kane ka khusnam ka kynthup ïa ka Tekcham Ranjita Devi kaba la ïoh ban pdiang ïa ka Female referee of the year.
Katba na ka liang ka khusnam ‘male referee of the year’ ka leit sha u Venkatesh R bad u Viramuthu R kum asst. referee of the year.
Kum ka referee ka Kong Ri-ïohlang, 34 snem ka rta, ka la lah ha kaban paw bad tyngshaiñ ha ka kam tad haduh ba kan da shah jied na ka bynta ban ïadon bynta ban pynïaid ïa ka jingïakhun ïa ka semifinal jong ka U-17 Women’s World Cup 2024 ba la ïakhun hapdeng ka Spain
pyrshah ïa ka England.
Dang shen, kum ban shu pynkynmaw, ka Kong Ri-ïohlang ka la shah jied kum kawei napdeng phra ngut kiwei pat ki assistant referee kynthei ban don bynta ha ka ban pynïaid ïa ka semifinal jong ka AFC Women’s Champions League 2024-25, kaba la buh ban long ha sorbah Wuhan, China naduh ka 21 haduh 24 tarik mynta u bnai Jymmang, kaba hangne ruh, napdeng ki assistant referee jong ka India dei tang ka Kong Ri-ïohlang kaba la ïoh ïa kane ka kabu ksiar ban shah jied ban don bynta ha kane ka lympung.
