Jowai, Jymmang 02
Ka Mowkaiaw CYC ka la jop da 14 run pyrshah ïa ka Evergreen Mukhla Mission ha ka jingïalehkai District Cricket League 2025 ba la pynïaid da ka West Jaiñtia Hills District Cricket Association (WJHDCA) ha ka 2 tarik Jymmang.
Ïa ka kynting pisa la jop da ka Mowkaiaw CYC ha kaba ka la kam trai ban tied nyngkong bad ïoh 105 run na bynta ban liem lut baroh 10 wiket ha 24.4 over. U Kitboklang Lyngdoh jong ka Mowkaiaw CYC marwei u la tied 37 run na ki 38 bol ryngkat bad 5 tylli ki Four (4s).
U Kamkini Sari bad u Shoristar Suna kum nongkawang bol jong ka Evergreen Mukhla Mission ki la ïoh ban shim mar 3 wiket.
Namar ka jingpynthut jong u slap, ïa ka thong la pynduna sha ka 61 run na 18 over da kaba pyndonkam da ka DLS Method.
Ka Evergreen Mukhla Mission ha ka pali ban wan beh ïa ka thong, ki nongtied ki la lah ban tied tang 47 run bad hap lut baroh 10 wiket ha ka over kaba 17.4.
Napdeng baroh ki nongtied dei tang u Conard Sana uba ïalehkai bha da kaba ïoh 19 run na ki 25 bol. U Sandabiang Lathong kum nongkawang bol jong ka Mowkaiaw CYC u la ïoh ban shim 4 wiket na ki 2.4 over bad kumjuh ban ïohpdiang ïa ka nam ‘Man of the Match’.
Ka jingïalehkai ha ka 03/05/25 kan long hapdeng ka Young Lad’s CC pyrshah ïa ka Ummulong SC ha ka por 8.30 baje mynstep.
