Paris, Jymmang:
U Myntri kam bar ri jong ka France, u Jean-Noel Barrot, ha ka Sngi Palei u la ong ba ka European Union ka dang pynkhreh ban hiar thma ia ka Russia da ki jingpynjari ha kane ka sien kaba 17, da kaba thew ruh ia U President ka Russia- u Vladimir Putin, kum u maw jynthut ia ka jingsuk ha Ukraine.
Ka kynhun jong ki 27 tylli ki ri, ka la pynjari ïa ki jingpynshitom kiba khlem pat ju jia mynno- mynno ruh ïa ka Russia, kum ka jingkynthoh halor ka jingleit hiar thma jongka pyrshah ia ka Ukraine bad ka la ong ba mynta u snem, kan nym weng noh ïa ki jingpynjari kyndon, katba u Putin um pat phah mih noh shi syndon ïa ki shipai jong u na Ukraine.
Kumta, utei u heh u la ong ruh ba kum ki nong Europe, un ieng ryngkat bad kitei kiwei pat ki ri ban ïasynran lang ïa kane ka jingthmu jong ka dewbah Europe da ka jingpynjari kaba 17 bad u la dep kular ruh hakhmat u heh Senator jong ka US- u Lindsey Graham, ba kin ialeh ban pynïadei ïa baroh ar ki jinglong bad ka por jong kine ki ar tylli ki jingpynjari.
U Graham, u la lum ïa ki phew ngut ki nongthaw aiñ na baroh arliang mamla, ban kyrshan ïa ka jingthmu ban pynjari shuh shuh ïa ki jingpynjari kyndon ïa ka Russia bad kumjuh ruh ban buh khajna ïa ki ri, kiba thied ïa ka umphniang jong ka Russia.
Ki shipai jong ka Russia ki la sdang ïa ka jinghiar thma ba pura ïa ka Ukraine ha u bnai Rymphang jong u snem 2022 da ka jingthmu ban knieh jubor ia ka bor synshar kaba ka Ukraine ka dang lah ban tehlakam bad ialeh pyrshah haduh mynta, da ka jingïarap ba jur jong ki para marjan khamtam ka US ha kitei ki por ba ka Russia ka leit ban hiar thma tyngeh ia ka Ukraine.
