Nongpoh, Jymmang 02
Kumba long ha u snem ba la dep, ka Meghalayan Age Limited ryngkat bad ka tnad Tourism, Agriculture bad Farmer’s Welfare ha ka Sngi Thohdieng, ki la ïoh ban plie paidbah bad sdang ïa ka tamasa Sohshan lane kata ka ‘Strawberry Festival’ ba-ar sngi lynter ha Sohliya, Ri-Bhoi District. Kane ka dei ka sien kaba ar ba ïa kane ka tamasa la pynlong ha ka shnong Sohliya.
Ïa kane ka tamasa la wan ban plie paidbah da u Deputy Commi-ssioner ka Ri-Bhoi District, u Abhilash Baranwal ha ka jingdon ryngkat u District Horticulture Officer ka Ri-Bhoi, u Pranjal Datta, u Rangbah Shnong ka Sohliya, Bah Ostander Lyngkhoi nalor ki nongrep, ki ‘riew paidbah bad ki khynnah skul ka thaiñ.
Kum ban shu kdew hangne, ka jingpynlong ïa kane ka tamasa ha kane ka shnong Sohliya, kaba la ithuh ruh kum kata ka shnong jong u sohshan, ka dei ban kyntiew ïa ka kam rep sohshan ha ka Jylla, ban kyntiew ïa ka ïoh ka kot jong ki paidbah nongrep, khamtam ha ki thaiñ nongkyndong bad ruh ban kyntiew ïa ka kam jngohkai pyrthei.
Ha kane ka tamasa, la sakhi ruh ïa ka jingdon jong ki nongrep kiba la wan ban pyninam ïa u sohshan, ka waiñ, jam bad kiwei-kiwei de ki jingdih jingbam kiba la pynmih na u sohshan.
Haba kren ha kane ka sngi, u Deputy Commissioner ka Ri-Bhoi District, u Abhilash Baranwal u la ong ba ka jingrep ïa u sohshan ka long kaba ïohnong bha bad ba ka mariang ruh ka dei kaba ïahap bha ban thung ïa une u jait soh ha kine ki thaiñ bad ai ruh ka jingkular ba na ka liang jong ki bor pynïaid District ryngkat bad ka tnad Horticulture bad ka Sorkar Jylla, ki long kiba la kloi ban kyntiew bad pynbha shuh-shuh ïa ka rukom rep ïa u sohshan katkum ka jingdonkam ki paidbah nongrep.
U Abhilash Baranwal u la pynpaw ruh ïa ka jingkyrmen ba ka shnong Sohliya kan ïai thung bad pynmih ïa u sohshan khnang ba kiwei ki shnong kiba marjan ruh kin shim ïa kane ka kam rep kaba ai jingmyntoi bad ïohnong shibun.
U la ai ruh ka jingïaroh ïa ki nongpynïaid ïa kane ka tamasa bad ai ruh ka kitbok-kitrwiang ba kane ka tamasa kan ïaid beit ïaid ryntih bad kan long kaba jop.
Haba ïoh pat ban ïakren bad katto-katne ki nongrep kiba la wan ban ïashim bynta ha kane ka sngi, ki la ïathuh ba kane ka kam rep sohshan ka long kaba myntoi bad ïohnong bha bad kumba ka jingïoh kam Sorkar ha kane ka juk kaba mynta ka long kaba shitom, ka jingrep ïa u sohshan ka dei ruh kawei na ki lad ïoh-kam ïoh-jam.
Haba ïoh ban ïakren pat bad uwei u phareng uba dei na ka ri New Zealand bad uba la ïoh lok Khasi bad la shong la sah ha kane ka Jylla la bun snem, u la ai ka jingïaroh ïa ki nongpynïaid kane ka tamasa ba ka rukom pynkhreh pynkhrum ka long kaba ishongkun, hynrei pynpaw pat ïa ka jingsngewsih ba kam biang satia ka jingpynbna paidbah (publicity) ha kaba ïadei bad kane ka tamasa khamtam ha kaba ïadei bad ka por ban pynlong ïa kane ka tamasa.
