Khliehriat, Jymmang 02
Uwei u briew ïa uba la tip kyrteng kum u Lando Shylla u la duh noh la ka jingim ha ka jingjia aksiden kali hapdeng ka trok bad ka Mahindra Pick-up kaba la jia ha Wapung, East Jaiñtia Hills District ha ka 2 tarik Jymmang.
Ki pulit ki la ïathuh ba kawei ka trok kit mar kaba don ïa u nombor AS-01-LC-5896 kaba la ñiah da u Samir Malakar na Agartala ka dang ïaid na Lumshnong sha Guwahati, hynrei ynda la poi ha Wapung kawei ka kali Pick-up kaba don ïa u nombor ML-11-6931 kaba la ñiah da u Lando Shylla na Lumshnong kaba wan mar pyrshah bad sted bha bad kaba ïaid bakla sha ka liang bym dei (Wrong Side) ka la tynrah ïa kane ka trok.
Ki paidbah kiba la sakhi ïa kane ka jingjia ki la ïathuh ba u nongñiah ka trok u la pyrshang ban ñiah ïa ka kali sha kawei pat ka liang, pynban ka jingïaid sted kane ka ‘Pick-up’ bad ka jingbym lah shuh u nongñiah ban tehlakam ïa ka kali ka la tynrah mar khmat, la ïathuh ki pulit.
Ki pulit ki la ong ba namar ka jingjur jong ka jingïatakhuh, u nongñiah kane ka ‘Pick-up’ u la khlad noh ha Khliehriat Civil Hospital na ka daw ka jingmynsaw jur. Katba u nongñiah ka trok u la pyndem hi ïalade hakhmat ki pulit bad la ïalam ïa u sha hospital ban eksamin.
Hadien ba la pyndep ïa ki jingdonkam jong ka aiñ ha ka jaka ba jia ka aksiden, la kurup bad tan ïa baroh ar tylli ki kali sha Kongong, ka jaka ba buh khyrdop da ki pulit East Jaiñtia Hills.
