Shillong, Jymmang 02
U Myntri ba khmih ïa ka tnat Border Area Development, Rakkam A Sangma u la ong ba ha ki 4-5 bnai ba la dep ki don palat spah ngut ki nong Bangladesh ba wan rung be-aiñ ba la ïoh bat noh.
Haba kren bad ki lad pathai khubor, u Rakkam uba dei ruh u MLA na Rongara-Siju u la ong ba ka kam ba ïadei bad ki khappud ka dei kaba khia bha bad ka dei ka kam jong ka Sorkar India, hynrei namar ba u mihkhmat na ka konstitwensi kaba don ha khappud Bangladesh, u la pynpaw ba kam don ka jingshong shngaiñ ha khappud namar ka jingwan rung be-aiñ jong ki briew na shiliang pud.
U la ong ba ka Ministry of Home Affairs ka la shim ïa ki sienjam ban khanglad ïa ka jingïoh rung ki briew na Bangladesh.
Haba kubur ba ka jingïada ïa ki khappud ha Meghalaya ka long kaba tlot bha, u Myntri u la ong, “Ki khappud hapoh ka Jylla jong ngi ki long kiba tlot bha, ngi ïohi ïa kata. Ki shipai kiba pahara ha khappud ki duna bha, ngim don ïa ki jingtei kiba biang bad ngim don ïa ki surok kiba bha,” la ong u Rakkam.
“La ïathuh ïa nga da ki bor ba dei peit patok, ki don palat ïa shispah kiba wan rung be-aiñ ha ki 4-5 bnai ba la dep ha Shillong bad ha ka Jylla. Kum kane ka jia, nga tharai ka Home Ministry bad ka tnat Kam Pohïing ka Jylla ki la shim ïa ki sienjam ban tehlakam ïa ka jingwan rung be-aiñ,” u la ong.
Haba kylli, u la ïathuh ba hadien ka jingkulmar kaba la mih ha Bangladesh ha ki khyndiat bnai ba la dep, ka la don ka jingpynkhlaiñ ïa ki bor pahara ha khappud.
Na ka liang u Rakkam u la kyntu ïa ki nongshong shnong ka Jylla ha khappud bad ka Bangladesh ba kin long kiba husiar bad peitngor, namar ka lah ban mih kano-kano ka jingjia na ka jingwan rung be-aiñ na Bangladesh.
Haba shim nuksa ïa ka jingjia shah pyntriem ki nongjngohkai ha Pahalgam, u Rakkam u la ong, “Ha baroh kawei ka Ri kaei-kaei ka lah ban jia ha kano-kano ka por. Kumta nga kyrpad ïa ki nongshong shnong ha khappud ba kin long kiba husiar bad peitngor.”
