Shillong, Jymmang 02
Ka North Eastern Indira Gandhi Regional Institute of Health and Medical Sciences (NEIGRIHMS), Shillong ka la ong ba ka la dep ban phah lut ïa baroh ki shithi, jingpynpaw lem bad ki jingpyntip kiba la wan na baroh ki liang sha ka tnad Sorkar Pdeng ba kan khmih bniah bad leh ïa kaba donkam.
“Ka NEIGRIHMS ka la phah lut ïa baroh ki shithi, ki jingpynpaw, bad ki jingpyntip na ki seng trai-ri, MP, bad Myntri ka Koit ka Khiah ka Jylla sha ka tnad Sorkar Pdeng ba kan khmih bniah bad ban leh ïa kaba donkam,” ong u Director ka NEIGRIHMS, u Prof. (Dr.) Nalin Mehta ha ka kyrwoh haba pynshai halor ki jingeh kiba la mih ha kaba ïadei bad ka jingpynrung kam na bynta ka kam nos.
Kine ki jingpynpaw ki kynthup ïa ki jingdawa kiba ïadei bad ki nongrim bhah kam jong ka jaka, ka jingpynkiew ha ka rta, ka jingpynïaid hi ïa ka eksamin thung kam da ka NEIGRIHMS, bad ka jingpynlong ïa ka eksamin ha ka rukom jong ka OMR.
“Ka long kaba donkam ban pynshai ba katto-katne na kine ki rai ki hap hapoh ka jingpeit jong ka tnad ka koit ka khiah ka Sorkar Pdeng bad ym shym la bynshet ha u Director ne ha ka bor pynïaid jong ka shlem pule. Ka NEIGRIHMS ka treikam thik katkum ki jingbthah, ki hukum, bad ki jingbthah pynïaid kam ba la ïoh na ka tnad Sorkar Pdeng,” u la ong da kaba bynrap ba yn ap shuwa ïa ka jingpynïaid bad jingmynjur na ka tnad Sorkar Pdeng halor kine ki mat ba la kdew haneng.
Hashuwa, u la ong ba ka shlem pule ka la aiti ïa ka jingtyrwa sha ka tnad ka koit ka khiah ka Sorkar India, ha ryngkat ka jingban jur halor ka jingai jingmut na bynta ban pyntreikam ïa ka jingïabiang jingkheiñ kaba 80:20 (kynthei bad shynrang) ha ka jingpynrung kam sha ki kam nos, kaba ïabeit ryntih bad ka rukom kaba la bud da ki shlem pule ba paw kum ka AIIMS bad PGIMER.
U la ong ba ïa kane ka sienjam la shim hadien ba la pyrkhat sani bha halor ka jingïabiang ka bym noh shiliang hapdeng ki kynthei bad shynrang haba phai sha ka liang ki nongtrei ka koit ka khiah bad ka jingjubab ïa ki jingpynpaw ba la ïoh na ki nongshim bynta bapher-bapher.
Ka kyrwoh ka la pynshai ruh ba ki Ophisar Nos shynrang kiba la pynïasoh sha ka NEIGRIHMS lyngba ka jingpynrung kam kaba khatduh jong ka NORCET kim shym la shah jied namarba ki kham duna ka jingtbit ne kum ki kyrtong “ba sah”.
“Pynban, katto-katne na ki, ki don ïa ki kyrdan kiba kham heh hynrei la bhah sha ka NEIGRIHMS namar ka jingïabiang jingkheiñ kaba 80:20 na bynta ka jingthung kam ïa ki kynthei bad shynrang kaba pyntreikam ha ki shlem pule jong ka AIIMS,” u la ong.
Kumta, la jied ïa ki kynthei kiba ïoh ïa ki kyrdan ba kham sha trai na bynta ka AIIMS, katba ïa ki shynrang kiba ïoh ïa ki kyrdan ba kham heh la pynkynriah sha NEIGRIHMS hapoh jong ka rukom treikam ka jingai bhah ka Sorkar Pdeng, ong u Director.
Shuh shuh u la bynrap ba ka shlem pule ka ïai bteng ban aiti lut na bynta ka jinglong shai ha ka kam, ka jingbym shah liang, bad ka jingbud ryntih ïa ki kyndon Sorkar ha baroh ki rukom thungkam.
“Ngi kyntu ïa baroh ki nongshim bynta ban ïai ap ïa ka jingpyntip ba tikna na ka tnad Sorkar Pdeng bad ban kiar na ki kam kiba lah ban pynthut ïa ka jingtreikam jong kane ka shlem pule,” u la ong.
