Shillong, Jymmang 02
U Myntri Rangbah ka Jylla, Conrad K. Sangma, ha ka Sngi Thohdieng, u la pynïaid ïa ka jingïalang bad ka tnad State Disaster Management Authority (SDMA) lem bad kiwei-kiwei ki tnad treikam (ba dei khmih) ban khmih bniah ïa ki lad jingpynkhreh jong ka Jylla haba ïadei bad ka jingwan jong u slap.
U Sangma haba shim jingkheiñ halor ka jingpynkhreh na bynta ka por slap ka ban wan, u la ong ba ka jingïatreilang kaba janai hapdeng ki tnad treikam bad ki kynhun seng bapher-bapher ka long kaba kongsan ha ka saiñdur jingpynkhreh ym tang ban pynduna ïa ki jingshah ktah hynrei ban pyntikna ruh ïa ka jingshimkhia kaba paka, ha kawei ka liang ka ban pynduna ïa ka jingduhnong bad jingjynjar bad ban pynneh ïa ka jinglong kumba ju long.
U la bynrap ruh ba dei ban pynbiang mardor ïa ki lad jingïarap, ka um-bam um-dih bad ki ïing ki sem lada jia ba don kano-kano ka jingjia.
Haba ban jur halor ka jingdon bynta jong ki Block Disaster Management Committee, ki Village Disaster Management Committee bad Village Executive Committee, u Myntri Rangbah u la bthah ïa ki Deputy Commissioner (DC) ban khot ïa ki jingïalang man ka por bad bynrap ba dei ban ai ïa ki jingbthah bad ki kyndon kiba tikna bad kiba batai shai sha ki kynhun ha ki shnong ki thaw.
U Sangma u la ban biang halor ka jingdonkam ban pynsaphriang ïa ki jingtip sha ki paidbah ha ki kyrdan jong ki shnong ki thaw ha ka rukom kaba ryntih lyngba ki lad pathai khubor bapher-bapher bad ha ki ktien trai-ri.
Haba pyntip shaphang ki lad ki lynti ba la shim da ka Sorkar ban pynbha ïa ki rukom ai jingmaham kiba kloi, u la bynrap, “Man la ka thaiñ ka don la ki jong ki jingduna bad ka Sorkar ka la shim ïa ki sienjam ban buh dak ne ‘map’ ïa ki jingma kum ka jingshlei um ha Ri-lum Garo bad ka jingtwa khyndew ha Ri-lum Jaiñtia, kumjuh ban thaw ïa ka rukom treikam na ka bynta ka jingïoh jingtip kaba kloi bad ban tip lypa ïa kaei ka ban sa jia.”
Shuh shuh u Myntri Rangbah u la khmih bniah halor ka jingdon jong ka jingbun briew, jinglum thup, ki tiar bad kor treikam kum ki puh shilum, ki lieng bad kiwei-kiwei.
U la ong ruh ba ka tnad surok, um bad bording ki long ki tnad treikam kiba kongsan bad kiba shah ktah jur bad kumta, u la bthah ïa kine ki tnad treikam ban kham pynkhreh bha halor kane ka bynta.
U la ong ruh ba ïa ka jingpynkhreh lem bad ki ‘Mock Drill’ dei ban pynlong na ka por sha ka por namar kine kin kyntiew shi kat dei haba ïadei bad kane ka bynta.
Ha kane ka jingïalang, la donlang ruh u Symbud Myntri Rangbah ka Jylla, Bah Prestone Tynsong, Myntri ka tnad ka koit ka khiah, Dr. M. Ampareen Lyngdoh, Chief Secretary, Bah D.P. Wahlang, heh ophisar na ka tnad IMD, PHE, Koit ka Khiah, PWD, bording lem bad ki Deputy Commissioner, ophisar bapher-bapher jong ki distrik kiba la shim bynta lyngba ka ‘video conferencing’.
