Guwahati, Jymmang:
Ka Congress ha ka sngi Thohdieng (1 tarik u Jymmang) ka la ujor sha ki pulit pyrshah ïa u Myntri Rangbah ka Assam u Himanta Biswa Sarma halor ka jingkynnoh ba u la kren beiñ ïa ki kynthei ha ka jingïalap ilekshon Panchayat kaba dang shen.
Ka Assam Pradesh Congress Committee (APCC) ka la mudui bun tylli ki jingujor ha ki jaka treikam jong ki distrik ha kylleng ka jylla kum ka jingpyrshah ïa ka jingkren jong u Sarma ha ka 28 tarik, Ïaïong. Hynrei ki pulit ki dang hap ban buh jingmudui ejahar bad ki la ong ba ki dang tohkit ïa ki jingujor.
U Sarma, ha ki jingïalap ilekshon Panchayat, u la kdew ïa ka jingkren jong ki sakhi na ka kaiphod jong u Justice (Retd) Biplab Kumar Sharma Commission halor ki jingbym ïaid beit ha ki eksamin jong ka Assam Public Service Commission (APSC) jong u snem 2013 bad 2014, ha ka por ba ka Congress ka dang synshar.
U la ong ba ka jingkren jong u nongsakhi ka pynskhem ba ki kynthei “ki hap ban shim ïa ka lynti kaba bakla” ban ïoh kam ha ka por jong ka sorkar Congress.
