Nongpoh, Jymmang 02
Uwei u nongñiah thuk-thuk na ka Jylla Assam, u la ngat ha ka jingmynsaw jur hadien ba ka thuk-thuk kaba u ñiah ka la leit ban tynrah ïa u ‘divider’ jong ka surokbah National Highway 6 kaba dang hap ha Umkaliar jong ka thaiñ Umsning.
Katkum ka tyllong khubor na ki pulit, la ïathuh ba kane ka jingjia ka dei ha ka por kumba 3 baje janmiet mynta ka sngi, ha kaba katei ka thuk-thuk kaba don ïa u nombor AS-21-M-8348 kaba la ñiah da u Dhoniram Das, 24 snem ka rta na ka shnong Khatgaon, Jaluguti Charaibahi, Marigaon District jong ka Jylla Assam, katba u dang kiew sha nongbah Shillong na Guwahati.
La ïathuh ba ynda poi ha Umkaliar, utei u nongñiah u la pyrshang ban tam shakhmat ïa kawei ka Tata Sumo bad dei ha kane ka por ba um lah shuh ban tehlakam ïa ka thuk-thuk kaba u ñiah haduh ba u la leit ban tynrah syndon ïa u ‘divider’ jong ka surokbah bad mynsaw jur.
Na ka liang ki bor pulit ka thanat Umsning, ki la rah noh ïa utei u nongñiah sha Umsning CHC ban pynïoh ïa ka jingsumar ba kyrkieh bad namar ka jingjur jong ka jingmynsaw, la bthah ban ban rah noh ïa utei u nongñiah sha ki jaka ai jingsumar ba kham halor ka nongbah Shillong.
La ïathuh ba ki pulit lyngba ka kali khwai, ki la rah noh ïa katei ka thuk-thuk sha thanat Umsning na ka bynta ban buh bha bad pynlong ïa ka jingtohkit halor kane ka jingjia.
