Shillong, Jymmang 02
Ka Sorkar Jylla ka la pynkhreh ban pynkynriah noh ïa ka len ki CRPF kaba don ha Mawlai mynta u snem, bad yn rah noh sha ka len ba thymmai kaba la ai jaka da ka Sorkar ha Mawdiangdiang, sor thymmai.
Haba pyntip ïa kane, u Myntri ba khmih ïa ka tnat Arts & Culture, Bah Paul Lyngdoh u la ong ba ka tnat kan pynkynriah noh ïa ki CRPF na Mawlai na ka jaka ba don ka Tribal Research Institute (TRI) sha Mawdiangdiang, bad ka tnat kan sa shimti ban pyndonkam ïa katei ka jaka kaba don 8 akar.
“Ngin pynkynriah noh ruh nangne na Tribal Research Institute kaba don ha Mawlai, ngin shimti ïa ka khyndew kaba don kumba 8 akar bad ka jingpynkynriah ïa ki CRPF na kane ka jaka sha New Shillong kan jia mynta ka snem,” la ong u Myntri uba dei ruh u Nongaiktien ka Sorkar.
U la ïathuh ba ha ka sngi Palei ka la don ka jingïalang bishar kam ha kaba u Principal Secretary ka tnat Arts and Culture uba dei ruh u secretary ka tnat Kam Pohïing u la ai ïa ka kaiphot ba ka jingpynkynriah ïa ki CRPF na Mawlai yn pyndep mynta u snem.
Kane ka jingpynkynriah noh ïa ki CRPF na Mawlai ka la mih hadien ba ki paidbah nongshong shnong ki la ud ïa ka jingpyndik ba man ka por jong ki CRPF kiba don ha katei ka jaka.
Katkum ka jingïathuh u Bah Paul ïa katei ka jaka 8 akar kaba la don lypa ruh ka ‘amphitheatre’ yn pyndonkam pura noh da ka tnat Arts & Culture.
Ha kajuh ka por u Myntri u la pyntip ruh ba naduh ka Dorbar Synrai ka Jylla ka ban sa wan yn sa pynlong noh ha ka Ïingdorbar Thaw Aiñ ba thymmai ha Mawdiangdiang, bad ïa ka ïing ba pynlong dorbar mynta kaba don ha Brookside, Rilbong yn buh noh da ka library auditorium.
“Ngi ngeit ba naduh mynta u snem kumba la pynpaw da u Speaker ka ïingdorbar thaw aiñ, kan long noh sha New Shillong, Mawdiangdiang,” u la ong.
Na ka liang u Myntri u la pyntip ba ka tnat Arts & Culture ka pynkhreh ban plie noh ïa ‘State of the Art Museum’ ha u Jylliew ban wan ha State Central Library Auditorium.
U la ong ba ha kane ka museum la pynbiang nadong shadong katkum ki teknoloji thymmai.
U Bah Paul u la ïathuh ruh ba ka Sorkar kan sa plie noh ar tylli ki cinema hall ha Shillong na ka bynta ban kyntiew ïa ki nongshna phlim ka Jylla.
U la pyntip ba kine ki cinema kiba tip kum ki ‘black box’ yn buh kawei ha La Riti Complex kaba don ha Mawdiangdiang bad kawei pat ha Library Auditorium.
U la ïathuh ba kum kine kijuh ki cinema hall yn sa plie ruh ha sor Jowai bad Tura ha kane ka mang tyngka kaba mynta u snem, katba ha ki snem ban wan yn sa shna ruh ha kiwei ki district ka Jylla.
