Shillong, Jymmang 02
U Myntri ka tnat ïalehkai ka Sorkar Pdeng, Dr. Mansukh Mandaviya ha ka sngi Palei u la sam ïa ka khusnam Major Dhyan Chand Khel Ratna Award sha ar ngut ki rangïalehkai badminton (men’s doubles) jong ka ri India, u Satwiksairaj Rankireddy bad u Chirag Shetty.
Ha ka jingshisha kine ar ngut ki la dei ban shah pynkup burom mynshem snem hynrei kim shym la lah ban leit sha ka jingïalang pynkup burom ha ka National Sports Awards ha Rashtrapati Bhawan na ka daw ka jingleit shim bynta ha ka Malaysia Open Super 1000.
“La pynkup burom da ka khusnam Major Dhyan Chand Khel Ratna Award 2023 sha ki nongjop ha ka jingïalehkai badminton jong ngi, u Chirag Shetty bad u Satwiksairaj Rankireddy, ha New Delhi mynta ka sngi.
“Kane ka khusnam ka dei ka jingpynshisha ïa ka jingaiti bad ka jingïalehkai ba kyrpang jong ki ha madan. Nga kitbok-kitrwiang ïa ki ha ki jingpyrshang jong ki ha ka lawei ka ban wan,” la thoh ka Mandaviya ha ka rynsan lad pathai jong ka X.
Kine ar ngut kiba la bat teng ïa ka kyrdan ba nyngkong ha ka pyrthei ki la dei ban ïoh ïa kane ka khusnam ha u Rymphang, hynrei la pynkynriah noh hadien ba u kpa jong u Satwik u la khlad noh namar ka jingpang klongsnam.
U Chirag bad u Satwik ki la ïoh ïa ka snem 2023 kaba sah jingkynmaw, namar ba ki la khur ïa ka takma ksiar jong ka Asian Games (kaba nyngkong eh ha ka jingïalehkai badminton na ka bynta ka India ha kane ka jingïalehkai), ka nam lahduh jong ka Asian Championships, bad ka nam lahduh jong ka Indonesia Open Super 1000. Ki la khur ruh ïa ka takma rnong ha ka World Championship bad ïa ka takma ksiar ha ka Commonwealth Games naduh u snem 2022.
U Chirag bad u Satwik kiba la shongthait shipor hadien ba ki la rung sha ka quarter final ha ka Paris Olympic, ki la sdang tyngeh ïa ka samoi ïalehkai 2025 da kaba ïoh rung sha ka semi final ha ka Malaysia Open bad ka Indian Open.
