Khliehriat, Jymmang 02
Ka Wapung Higher Secondary School ka la ïoh rah ïa ka nam Overall Champion ha ka District Level Inter School Athletic Meet 2025 ba la pynïaid da ka shlem treikam District Sports Officer, (DSO), East Jaiñtia Hills ryngkat ka jingïatreilang bad ka East Jaiñtia Hills District Football Association.
Kane ka la wan hadien ba ka Wapung Higher Secondary School ka la khur 25 tylli ki takma kynthup 9 tylli ki takma ksiar, 7 tylli ki takma rupa bad 9 tylli ki takma rnong.
Kane ka jingïalehkai ka la poi noh sha kaba kut ha madan Teilang Playground, Dkhiah West, East Jaiñtia Hills District ha ka 2 tarik Jymmang ha kaba la wan ban pynhap pyrda da u Deputy Commissioner ka East Jaiñtia Hills District, Shivansh Awasthi, IAS.
Ka Sham Sham Secondary School bad Seiñraij Branch Upper Primary School, Mukhaialong ki la long kum nongjop ha ka Under-14 Boys bad Under-14 Girls.
Ka Wapung Higher Secondary School bad ka Sham Sham Secondary School ki la long kum lahduh ha ka Under-16 Boys bad Under-16 Girls, katba ha ka Under-18 jong ki shynrang la ïoh da ka Seiñjait Tuber Higher Secondary School bad ha ka liang ki kynthei la ïoh da ka San Shnong Secondary School.
U Kampher Dkhar jong ka Sham Sham Secondary School u la ïoh khur ïa ka nam Best Athlete, katba ka Useful Kyndait jong ka Seiñraij Branch Upper Primary School, Mukhaialong ka la ïoh ïa ka nam Best Female Athlete jong ka Under-14.
Ha ka Under-16, u Highbornson Muksor na Khliehriat Presbyterian Secondary School Best Male Athlete bad ka Naphishwa Dkhar na Seinjait Tuber Higher Secondary School ka la ïoh ïa ka nam Best Female Athlete.
Ha ka Under-18, u Ribait Bang u la ïoh ïa ka nam Best Athlete katba ha ka liang ki kynthei la ïoh da ka Budka Bang. Kine baroh ar ngut ki dei na Seinjait Tuber Higher Secondary School.
Ki nongjop ha ki jingïalehkai bapher-bapher kin mihkhmat ïa ka East Jaiñtia Hills District sha ka State Level Inter School Athletics Meet.
Nalor u Deputy Commissioner la donlang ruh u Superintendent of Police ka District u Giri Prasad, ka District Sports Officer, East Jaiñtia Hills District ka Kong Stephanie M Rapsang bad kiwei-kiwei.
