Shillong, Ïaïong 02
Ka Meghalaya Pradesh Congress Committee (MPCC) ha ka jingïalang jong ka Political Executive Committee kaba la long ha ka sngi Ba-ar ka la mynjur ïa ka rai ban kyrshan ïa ki sienjam jong ka Sorkar India halor ka jingjia shah siat ïap jong 26 ngut ki nongjngohkai ha Pahalgam, Jammu & Kashmir.
Haba kren bad ki lad pathai khubor ha ka sngi Balang, u Joint Secretary ka All India Congress Committee (AICC) uba peit ïa ka seng ha Meghalaya, Mathew Antony u la ong ba ka Congress ka la mynjur lang ïa ka rai jong ka AICC, kata ban ai ka jingkyrshan kaba pura ïa ka Sorkar India ban ther bad shim kam ïa kiba donkti ban pyntriem ïa ki ‘riew paidbah ha Pahalgam.
“Kumba la rai da ka AICC, ngi la mynjur ïa kawei ka rai ban kyrshan ïa ka Sorkar India ban shim kam pyrshah ïa ki briew kiba donkti ban pynmong bad pynmynsaw ïa ki briew jong kane ka Ri,” la ong u Anthony.
Ha kajuh ka por u Nongïalam ka Congress u la pyntip ruh ba ka PEC ka la mynjur ruh ban sngewlem ïa ka jingkhlad noh u Pope Francis.
“U Kpa Bakhuid, Pope Francis u dei uwei na ki nongwanrah ïa ka jingsuk kumba ngi la sakhi,” u la ong.
U la ong ba ka kynhun jong ka MPCC hapoh ka jingïalam u MLA, Bah Ronnie V Lyngdoh ki la leit ban ïakynduh ïa u Archbishop jong ka Shillong Archdiocese, Rev. Victor Lyngdoh ban phah ïa ka khubor sngewlem.
Ha kawei ka liang, u Nongïalam ka Congress u la ong ba ka seng ka kwah ban pynsngew sha ki nongshong shnong ka Meghalaya ba ka sorkar BJP ka la shu thaw ban pynngat mukotduma ïa ka longïing ki Gandhi na ka National Herald.
U la ong ba ka BJP ka la pyrshang ban sbor ktieh ïa ka Congress bad ka longïing Gandhi bad ka Associated Journalist Limited (AJL).
U la ong ba kane ka mukotduma ka dei kaba khlem nongrim ba ka BJP ka pyndonkam da ka Enforcement Directorate (ED) ban ïoh kynnoh pyrshah ïa ka Congress bad ka longïing Gandhi, bad bynrap ba ha ka jingshisha, kam don kano-kano ka jingpyndonkam ïa ka pisa naduh ba sdang. U Anthony u la kam ba kane ka jingleh ka BJP ka dei namar ba ka tieng thot-thot ïa ka Congress bad shen ka BJP kan ym ïoh shuh ban don ha ka bor, namar ba ka longïing Gandhi ka don ha man ki dohnud jong ki paidbah ka Ri India, kaba ïakhun ban ïoh ïa ka jinglaitluid ka Ri. U la ong ba ka MPCC ka kwah ban ïasam ïa kane ka khubor sha ki paidbah ka Meghalaya ban ym shah ïalam bakla.
