Shillong, Jymmang 02
U Bibiano Fernandes kum Coach u la jied ïa la ka kynhun ïalehkai kaba don 25 ngut dkhot na bynta ka SAFF U-19 Championship 2025, ryngkat u Yohaan Benjamin jong ka Shillong Lajong FC ban ïa don bynta bad kane ka kynhun ïalehkai.
Kane ka kynhun ka la wan poi ha Itanagar mynhynnin (Sngi Palei) ha shwa ka lympung ïalehkai, ka ban sdang naduh ka 9 haduh 18 tarik Jymmang ha madan ïalehkai Golden Jubilee ha Yupia.
Ka tyllong khubor ka la ïathuh ruh mynshem bnai ba u Yohaan u la shah jied napdeng 35 ngut. Kaba sngewtynnad, ka long ba la jied ïa u kum u nongïalehkai shapdeng mynshwa tangba kum u nongïalehkai shakhmat ha ka thup dang shen.
U Yohaan uba la kha ha Maharashtra u la don ha ka kynhun ki samla jong ka Lajong la katto katne snem mynta hynrei u la pawnam bha ha ka Shillong Premier League 2024, ha kaba ka Lajong ka la jop. U Yohaan uba lah ban ïalehkai ha baroh arliang (wing), u dei u nongïalehkai shakhmat bad u la thep 9 kol baroh ha ka SPL 2024; Wat la um shym la long satia u nongthep kol uba kynsai hynrei u la long ïaineh bad trei shitom bha, u la lah ban thep kol ha ki khyndai tylli ki jingïalehkai bapher-bapher. Une u rangïalehkai ba dang 17 snem rta u la long ruh u bynta ba kongsan jong ka kynhun ïalehkai ka SLFC kaba la wan ba ar ha ka Meghalaya State League 2024.
Ka India kum ka nongpynlong kan ïakhun pyrshah ïa ka Sri Lanka (9 tarik Jymmang) bad ka Nepal (13 tarik Jymmang) ha ka Group B. Ka Maldives, Bhutan bad ka Bangladesh ki don ha ka Group A. Ki ar tylli ki kynhun kiba jop na kawei pa kawei ka kynhun kin rung sha ka semifinal ka ban long ha ka 16 tarik Jymmang bad ka phainal kan long ha ka 18 tarik Jymmang.
Ka kynhun ïalehkai ka India ka la ïakynduh ïa u Kipa Ajay ha Itanagar uba dei All India Football Federation Treasurer bad Arunachal Pradesh Football Association.
Ka kynhun ïalehkai jong ka Blue Colts ka dei kaba la pyntbit ïalade ha Padukone-Dravid Centre for Sports Excellence ha Bangalore shwa ban poi sha Arunachal. Kane kan dei ka sien kaba nyngkong eh jong ka jylla Shatei Lammihngi jong ka Ri ban pynlong ïa ka lympung jingïalehkai phutbol jong ka pyrthei. Ïa ki tiket sha kane ka lympung lah ban thied na ka website slotallot.in.
