Nongpoh, Jymmang 02
Katba ka jingpyntreikam ïa ka surok Nongpoh-Umden-Sunapur ba la ju tip lyngkot ruh kum ka surok NUS ka dang ïaid shaid-shaid, u Bah Mayralborn Syiem, MLA ka Nongpoh ha ka sngi Thohdieng u la pynlong ïa ka jingjurip ïa kane ka surok ban pynthikna ba ka jingpyntreikam ka ïaid beit ïaid ryntih.
Ha kane ka jingjurip, la wan ban ïadon ryngkat ruh da u BDO ka Umling C&RD Block, Bah Eric Kevin Dkhar, ki ophisar ka tnat PWD (Roads) Nongpoh Division ba la lamkhmat da u Bah J Lyndem, Executive Engineer, u Bah F Sohkhlet, Assistant Engineer ka tnat MeECL Nongpoh, u Bah A Sun, Assistant Engineer ka PHE Nongpoh nalor kiwei kiwei de ki riew rangbah.
Kum ban shu kdew hangne, ka surok NUS ka don ïa ka jingjngai kaba 58 kilometer eiei bad la sdang ban pyntrei shwa na ki bynta kiba hap na Lad Iewmawlong ter ter shaduh Umden katkum ka Intermediate Lane ha ka jingjngai kaba 20 kilometer bad ka jinglut kaba T.49.53 klur lyngba ka State Plan katba ïa ka bynta ba sah na Umden sha Sunapur ha ka jingjngai kaba 38.6 kilometer yn sa pyntrei lyngba ka skhim PMGSY-III, Batch -I ha ka jinglut kaba T.47.20 klur.
Haba kren hadien ka jingjurip, u Bah Mayralborn Syiem u la pynpaw ïa ka jingsngewhun halor ka jingsted jong ka jingpyntrei ïa ka surok bad ba na ka liang ka jong u, kum u MLA u buh ka jingkyntu ïa u kontraktor ba pyntrei ïa kane ka surok ban pynsted ïa ka bad ruh ban pyndep hapoh shisnem kynthih.
U la ïathuh ruh ba nalor ka jingbuddien ha kine ki taïew ba la dep, ha kane ka sngi ruh ha ryngkat ka jingdon ki engineer bad ophisar, la ïoh ruh ban jurip ïa ki katto katne ki jaka kiba kham rit, kiba donkam shuh shuh ban kham pynheh khnang ba ka surok kan long kaba itynnad bad kaba skhem bad bynrap ba un dang ïai bteng ban jurip ïa kane ka surok wat ha ki sngi bad ki por ban wan ban pynthikna ba ka jingpyntrei ïa kane ka surok ka long kaba paka bad kaba ai jingmyntoi ïa ki paidbah.
Kumba ka jingshna ïa ka surok kala wanrah ruh ïa ka jingeh ïa ki paidbah na ka jingktieh ba ka dei ka aiom slap, u Bah Mayralborn u la buh ka jingkyrpad sha ki paidbah, ba kumba kila ïai shah baroh shi katta ba kin ïai shah biang sa shipor bad ynda la dep shna, kan long ka jingsuk na ka bynta ki paidbah hi baroh.
Shuh shuh, na ka liang u Bah Mayralborn u la ai khublei kyrpang ruh sha ka Sorkar kaba la pynurlong ïa kane ka jingangnud ki paidbah bad ai khublei ruh ïa ki engineer bad ophisar kiba don bynta ban khmih bad pynïaid beit ïa ka jingtrei jong kane ka surok.
