Nongpoh, Jymmang 04
Ki bor pulit ka thanat Nongpoh ha ka jingkhynra kaba la pynlong ha ka 3 tarik mynta u bnai, ki la ïoh ban kurup haduh 101 litar ka Petrol bad 84 litar ka Diesel kaba la thmu ban die sha ki paidbah ha ka dor kaba kham rem.
Ha kane ka jingkhynra jong ki bor pulit ïa katei ka dukan kaba la long trai da u Bah Omiwell Marbaniang na ka shnong Shangbangla, Ri Bhoi District, la ai jingïarap lang ruh da ki bor shnong ka Quinine lem bad ka kynhun jong ka Village Defence Party (VDP) ka shnong.
Na ka liang ki bor pulit ki la pyntip ruh wat lada u trai katei ka dukan u la kam ba ïa katei ka Petrol bad Diesel ka dei kaba u la thied na ki Petrol Pump kiba don marjan, hynrei la suba jur ba ki dei kiba shu tuh na ki mobile tower ne kiwei kiwei ki jaka.
Halor kane ka jingjia, ki bor pulit ki la maham ruh ïa ki Petrol Pump ba kim dei satia ban die ïa ka umphniang Petrol bad Diesel ha ki kynja jingthep kiba kynthup naduh ki bilor, ki klong jri, naba ki ‘riew sniew ha ka imlang sahlang, ki lah ban pyndonkam ïa ka umphniang ban leh ïa ki kam sniew.
Ha kajuh ka por, ki pulit ki la pyntip ruh ba ka jingdie ïa ka umphniang Petrol ne Diesel ka dei ban don da ka jingïoh jingbit kaba la aibor da ki bor ba dei khmih bad ba ka jingdie khlem ka jingïoh jingbit ka dei ka kam beaiñ.
