Shillong, Jymmang 04
U Myntri ba khmih ïa ka tnat Pule-Puthi ha ka Jylla, Rakkam A Sangma u la pyntip ba ka tnat ka la ïasyllok bad baroh ki skul ba pynïaid da ki kynhun bad ‘riew shimet, na ka bynta ban pynthikna ba baroh ki khynnah kiba pass ïa ka eksamin Secondary School Leaving Certificates (SSLC) dang shen kin ïoh ban leit pule.
Katkum ka jingïathuh u Rakkam, kumba 97 tylli ki skul Secondary jong ki kynhun bad riew shimet kiba la kyntiew kyrdan noh sha ki skul Higher Secondary mynta u snem.
“Lada ngam bakla, kumba 97 tylli ki skul jong ki kynhun bad riew shimet ki la kyntiew kyrdan noh sha ki skul Higher Secondary mynta u snem,” u la ong.
U Myntri u la ong ruh ba kiba bun ki khynnah ba la lait ïa ka SSLC mynta ki la shim admission ha baroh ki skul ba don ha ka Jylla, kynthup ha ki skul jong ka Sorkar bad ki riew shimet.
Haba kylli, na ka liang u Myntri u la ong ba baroh ki khynnah ban ïakhun biang ïa ka eksamin SSLC Supplementary, kiba don palat 7000 ngut ruh kin ïoh ban leit pule ïa ka Klas XI.
U la ong ka jingkyntiew kyrdan ïa ki skul la dei ban leh naduh kham mynshwa katkum ka National Education Policy (NEP), 2020, bad katkum ki jingdawa.
“Ki skul Sorkar ba la kyntiew kyrdan sha ki skul Higher Secondary ki don 23 tylli, bad ha kine ki skul don lut baroh ki laiñ pule (stream), ka Arts, Commerce bad Science,” la ong u Rakkam.
U la ong ba kane ka jingkyntiew kyrdan ka dei hadien ba ki khynnah ba pass ïa ka SSLC mynta u snem ki la bun, bad ka Sorkar ka kwah ban pynthikna ba baroh ki khynnah kin ïoh ban bteng ïa ki jingpule.
“Ka long kyrkieh bha kane ka jingkyntiew kyrdan ïa ki skul mynta u snem, namar kumba 10-12 hajar ngut tam kiba pass mynta u snem. Khnang ba baroh ki khynnah kin ïoh jaka pule, ngi la hap ban kyntiew kyrdan ïa ki skul Secondary sha ki skul Higher Secondary,” la ong u Rakkam.
