Nongstoiñ, Jymmang 04
Ka Nongpyndeng SS&CC ka la rah ïa ka nam lahduh ha ka First Division jong ka NDSA Premier League Football Tournament 2024-25 ba la pynïaid da ka Nongstoiñ District Sports Association.
Kane ka jinglah ban pynthikna ka la wan hadien ba ka la lah ban pynliem noh ïa ka Ladnongsba SC da 1-0 kol ha ka jingïakhun final kaba la long ha ka sngi Saitjaiñ ha madan New Nongstoiñ.
Ha katei ka sngi pynhap pyrda ïa kane ka lympung la ïadon lang u President ka NDSA, Bah B.S.Kharlor kumjuh u Bah Gilbert Sangriang, EE ka tnad Agriculture bad kiwei kiwei ki dkhot ka NDSA kiba la sam ruh ïa ki khusnam.
Ïa ka nam Best Player la ïohpdiang da u Shaiborlin Rmen na ka Mawkhlam SC, Best Goalkeeper ka leit sha u Skhembor Marshra na ka Nongpyndeng SS &CC, Top Scorer sha u Pynbianglang Kharsyntiew na ka Nongpyndeng SS &CC bad ïa ka nam Emerging player la ïohpdiang da u Damewanpli Rani na Nongkhlaw SC.
Na ka liang ka Football Committee jong ka NDSA ka la pyntip ruh ba ka jingïalehkai final jong ka Super Division kan long mynta ka Lah Sngi U Blei ha ka por 2 baje nohphai sngi hapdeng ka Pyndengrei SCSC pyrshah ïa ka Mawlarshong SC.
