Jowai, Jymmang 04
Ka SCA ‘B’ ka la jop da 2 wiket ïa ka SWKHDCA ha ka jingïalehkai kaba khatduh jong ka Under-16 Boys Inter District Cricket Tournament 2025 (Zone-1) ha ka sngi Saitjaiñ.
Ka SWKHDCA kaba la kam trai ban tied nyngkong, ka la ïoh 126 ha ki 43 over bad shah pynhap 9 wiket. U kapten ka kynhun Phrangborlang Syiemlieh u la tied 50 run na ki 117 bol ryngkat san tylli ki ‘four’. Katba u Arav Baraily u la shim 3 wiket ha ki 10 over na ka bynta ka SCA ‘B’.
Haba wan shimti ïa ka pali ba ar, ka SCA ‘B’ ka la lah ban kynjoh sha ka thong da kaba ïoh 130 run bad shah pynhap 8 wiket ha ki 27.1 over. U Suraj Chettri u la tied 94 run na ki 75 bol ryngkat kawei ka ‘six’bad 12 tylli ki ‘four’. Katba u Gillford Iawphniaw u la shim 4 wiket ha ki 4 over na ka bynta ka SWKHDCA.
Lyngba kane ka nam jop ka SCA ‘B’ ka la lamkhmat ha ka Group-A ryngkat 8 poiñ, katba ïa ka kyrdan ba-ar la ïoh da ka EJHDCA ryngkat 5 poiñ. Ha ka Group-B, ka RBDCA kaba la wan ba nyngkong ka la ïoh 6 poiñ bad EKHCA ka la wan ba ar da ka ba ïoh 4 poiñ.
Ha ka Zone-1 ki kynhun ba ïoh ban rung sha ka semi final ki dei ka SCA ‘B’ kaba la wan ba nyngkong ha Group-A, ka RBDCA kaba la wan ba nyngkong ha ka Group-B bad ka EKHCA ba ïoh best NRR. Na ka Zone-2 pat ki kynhun ba la ïoh ban rung sha ka semi final ka long ka TDCA kaba la wan ba nyngkong.
Te kumta ka SCA ‘B’ kan ïakhun pyrshah ïa ka EKHCA ha ka semi final jong ka Zone-1 ha Jowai (Mukhla), katba ka RBDCA kan ïakhun pyrshah ïa ka TDCA ha ka semi final jong ka Zone-2 ha Mendipathar. Kine ki jingïakhun kin long mynta Lah Sngi U Blei ha ka por 8:30 mynstep.
