Shillong, Jymmang 05
Ki nongïalam ka Hills State People’s Democratic Party (HSPDP) Youth Wing West Khasi Hills District ki la kyrpad ban pynbiang madan ïalehkai phlang plastik (Artificial Turf) bad ruh kiwei ki jingdonkam ha ki kam ïalehkai hapoh kane ka district.
Kane ka la wan hadien ba katei ka kynhun seng saiñ pyrthei hapoh ka jingïalam u President Bah Wellessly Lyngkhoi bad u Secretary Bah Thomas Kharbani kiba la leit ïakynduh ïa u Myntri ka tnat ïalehkai ka Sorkar Jylla u Bah Shakliar Warjri ha ka Lah Sngi U Blei hapoh ka kamra treikam jong u ha Secretariat bad ruh ban aiti ïa ka dorkhas.
Kat kum katei ka dorkhas, la ong ba ki samla jong ka West Khasi Hills khamtam na Nong-stoiñ, Mawshynrut bad Rambrai, ki la pyni ïa ka sap bad ka jingangnud kaba khraw ha ki jait jingïalehkai bapher bapher, wat hapdeng ka jingduna ki lad ki lynti kiba biang. Hynrei ka jingbym don ki madan ïalehkai kiba paka, kumjuh ki jaka ïalehkai (indoor & outdoor) ka la wanrah ka jingktah ïa ki nongïalehkai kiba don ïa ka jingangnud ba kin nangkiew shaphrang ha ki kam ïalehkai
Katei ka seng saiñ pyrthei ka wanrah ïa hynriew tylli ki mat jingdawa na ka Sorkar ba kan phaikhmat lem sha katei ka district na ka bynta ban pynpaw ïa ki madan phlang plastik ha Nong-stoiñ bad ha Rambrai ban kyntiew ïa ka jingïalehkai phutbol bad ban pynlah ban pynlong ïa ki prokram ai jinghikai baroh shisnem khlem da kheiñ ia ka jinglong ka suiñbneng.
Ka la dawa ruh ban pynbiang ïa ki jaka ïalehkai ne ki Multipur-pose Sports Complex khnang ban lah ban pynlong ïa ki jingïalehkai kum ka badminton, table tennis, volleyball, kumjuh ruh ki jaka kilan met bad ki jaka ai jinghikai kilan met bad kiwei.
Ban maramot pynbha ïa ki madan bad ki jingtei kiba la don lypa, kynthup ïa ka jingker ba paka, ki nala pyntuid um, ki floodlight, bad ki jaka shong na ka bynta ki nongïalehkai bad ki nongpeitkai.
Ban kyntiew ïa ki Grassroots Sports Prog-ram na ka bynta ki khynnah bad ruh ban shim khia na ka bynta ki samla khnang ban ithuh bad pynroi ïa ki sap ïalehkai jong ka thaiñ, da kaba thung ïa ki coach ki ban ai jinghikai ïa ki khynnah. Ka la kyntu ban ai jingkyrshan na ka bynta ban kyntiew ïa ka jingïalehkai siatkhnam ha ka thaiñ West Khasi Hills da kaba pynbiang ïa ki tiar ïalehkai bad ka madan ïalehkai siatkhnam.
Shuh shuh ha kaba kut katei ka seng ka la kyntu ïa ka Sorkar ba kan wanrah ïa ki lympung ïalehkai Meghalaya Games bad kiwei ki lympung ha ka thaiñ West Khasi Hills.
