Shillong, Jymmang 05
Ka Meghalaya ka la pynkut da ka jingjop kaba lai ha ka Group-A jong ka lympung ïalehkai Swami Vivekananda U-20 Men’s National Football Championship 2025, hadien ba ka la pynjem khnap ïa ka Bihar haduh 7-0 kol ha ka Lah Sngi U Blei ha Narainpur, Chhattisgarh.
Kane ka kynhun hapoh ka jingïalam u Bah Bobby L. Nongbet (coach) kaba la ïoh rung lyngba sha ka quarter final hadien ba ka la jop ïa ka jingïakhun kaba ar pyrshah ïa ka Kerala da 2-1 kol ha ka sngi Saitjaiñ. Kat haduh mynta ka la jop lai sien kynthih kynthup lang ïa ka jingjop da 4-0 kol ïa ka Rajasthan ha ka jingïalehkai kaba nyngkong ha ka 29 tarik u Ïaïong.
Kane ka nam jop pyrshah ïa ka Bihar ka la wan urlong lyngba u Ricky Kharkongor (4), kumjuh u R.T Hanson Pdang (9), Riborlang Lyngdoh Lyngkhoi (13 & 48), Franky Dkhar (17), Rimankhraw Kharumnuid (72) bad u Pyrkhatshaphrang Sumer (90+3).
Ha kane ka jingïakhun u Bah Bobby u la kylliang tang uwei u rangïalehkai na kaba ïakhun pyrshah ïa ka Kerala ha kaba u la pynmih ïa u Franky Dkhar ha ka jaka u Banlamkupar Rynjah ha kaba sdang jong kane ka jingïakhun.
U Ricky u la pynkhih jar nyngkong shwa ba u Hanson un thep ïa ka kol ba ar lyngba ka free kick. Ïa ka kol ba lai la thep da u Riborlang na ka daw ka jingbakla u rangapkol bad ïa kawei pat la thep da u Franky na ka bynta ban tam haduh saw kol ha ka kylla step.
Hadien ba la bteng biang ïa ka jingïakhun jong ka kylla miet, ka Meghalaya ka la ïoh ban thep biang sa lai kol. Kane ka la wan lyngba u Riborlang (48′), kumjuh u Rimankhraw Kharumnuid uba la thep lyngba ka penalty bad ïa kawei pat la thep shwa ban wai lyngba u Pyrkhatshaphrang Sumer na ka bynta ban ïoh jingjop shisyndon.
Lyngba kane ka nam jop ka Meghalaya ka la ïoh ban lamkhmat ha ka group-A ryngkat 9 point na ki lai sien ïakhun bad ka la thep haduh 13 kol bad shah thep tang shi kol. Te kumta ka Meghalaya kan ïakynduh pyrshah ïa ka kynhun kaba bat ïa ka kyrdan ba hakhlieh ha ka Group-B kata ka Karnataka ha ka quarter final ka ban long ha ka 9 tarik. Ka Karnataka ka dangsah sa kawei ka jingïakhun ha ka sngi Ba-ar hynrei ka la thikna ban ïoh rung sha ka quarter final.
Lah ban pynkynmaw, mynshem snem ka Meghalaya kam shym la lah ban jam sha ka quarter final na ka daw ba kam shym la lah ban ïalehkai bha ha ka jingïalehkai group.
Ki rangïalehkai ka Meghalaya ki long u Pyrkhat-shaphrang Sumer, Pynshailang L. Nonglait, Richborn Kharpuri, Rimankhraw Kharumnuid, Banpliebok Khongjoh, Riborlang Lyngdoh Lyngkhoi, Banlamkupar Rynjah, Mebannangkiew Thabah, Franky Dkhar, R.T Hanson Pdang & Ricky Kharkongor.
