Shillong, Jymmang 05
Ka tnad kam Pohïing ka Sorkar Pdeng ka la bthah ïa katto-katne ki Jylla ban pynlong ïa ki ‘Mock Drill’ ha ka 7 tarik u Jymmang ban pynkhaiñ ïa ki lad jingpynkhreh haba ïadei bad ki bor ïada, ong ki tyllong khubor ka Sorkar ha ka Lah Sngi U Blei.
Katkum ka khubor na ka ‘DD News’, ki ‘Drill’ kin kynthup ïa ka jingpyntreikam ïa ki ‘Siren’ jingmaham ‘Air Raid’ bad ka jingai jinghikai ïa ki ‘riew paidbah bad khynnah pule halor kumno ban ïada ïalade ha ka por jong ka jingshah thombor ha ki nongshun.
Ka khubor ka ong ruh ba kiwei-kiwei ki sienjam ki kynthup ïa ka jingpyndum tliw ne jingpynlip bording ne kino-kino ki jingshai, ka jingbuhrieh ne jingpynkylla dur ïa ki jingpyndait ba kongsan, bad ki jingpynkhreh ba ïadei bad ki buit bathymmai ban pynkynriah ïa ki briew.
Kumban shu kdew hangne, ki jingïakynad hapdeng ka India bad Pakistan ki la nang jur hadien ka jingshah thombor kaba la jia ha Pahalgam, ha kaba 26 ngut ki briew, kiba bun ki nongjngohkai pyrthei ki la shah pynïap.
Na ka liang ka Sorkar ka la kular skhem ban pynshitom da kaba tyngeh katkum ka aiñ ïa kiba donkti ha kane ka kam.
Ha ka Sngi U Blei, la pynlong ïa ka jingpynlip bording ne jingshai kaba 30 minit ha ka thaiñ Ferozepur Cantonment hapoh ka jingpeit jong ka Cantonment Board bad Station Commander.
“Ka jingpynlip bording ka neh naduh ka por 9 baje mynmiet haduh 9:30 baje mynmiet. Ïa baroh ki bording la pynlip katkum ba la bthah. Ïa ki kali kiba la lap ba pynmeh ‘light’, la bthah ba kin pynlip noh. Ki pulit ki la nang pynjur ïa ka jingpahara – ha kaba la phah ha baroh ki lad ba kongsan”, ong u Gurjant Singh, SHO ka Ferozepur Cantt Police Station.
Ka Sorkar la ai ïa ki shipai ‘ka jinglaitluid kaba pura ban rai ïa ka rukom, ki thong, bad ka por’ jong ka jingjubab ki shipai ka India halor ka jingthombor jong ki lehnoh ha Pahalgam. Ka la shim ruh ïa ki sienjam ha ka liang ka jingïadei bad ka ïoh ka kot, kynthup ïa ka jingpynsangeh noh shuwa ïa ka ‘Indus Waters Treaty’.
Kumjuh, hadien ka jingïalang jong baroh ki seng saiñ pyrthei, ki seng ka liang pyrshah ki la pynpaw ïa ka jingkyrshan ban leh da kaba tyngeh pyrshah ïa kito kiba donkti.
Nalor kane, ha ka jingïalang jong ka Cabinet Committee on Security, ki heh Sorkar ki la kdew ba kane ka jingshah thombor ka la long hadien ka jingseisoh jong ka ilekshon ha Jammu and Kashmir bad ka jingkiew shaphrang jong ka roi ka par ha ka ïoh ka kot hapoh ka thaiñ.
Shuh shuh ka India ka la pynjari da kaba khang mardor ïa (baroh) ka jingwanrah bad jingshalan mar na Pakistan – kaba la pynsangeh shi syndon ïa ka khaïi-pateng hapdeng ki arliang mamla, katkum ka jingpynbna ba la pynmih da ka tnad khaïi-pateng bad karkhana ka Sorkar Pdeng.
ïa kane ka ‘mock drill’ yn pynlong ruh hapoh ka Jylla Meghalaya nalor kiwei pat ki jylla jong ka Ri, kum ka jingai jinghikai bad ruh ban pynkhreh lypa lada don kino kino ki jingjia shah thombor.
