Shillong, Jymmang 05
Ka Meghalaya Cricket Asso-ciation (MCA) ka la pynpaw ka jingïaroh ïa ki khynnah kiba la ïoh kheit ïa u soh jong ka jingjop ha ka eksamin Higher Secondary School Leaving Certificate 2025, ba la pynlong da ka Meghalaya Board of School Education (MBOSE). Kaba pynkmen shuh shuh ïa kane ka synjuk ka dei halor ka jingjop u kapten ka kynhun U-19 ka Jylla, u Dipankar Barua uba la wan balai ha ka Commerce stream.
Hadien ba la pynbna ïa ka result da ka MBOSE ha ka Lah Sngi U Blei, u Dipankar, samla pule jong ka Laban Bengalee Boys’ Higher Secondary School, Shillong u la ïoh 468 mark.
Na ka liang u President ka MCA, Nababrata Bhattacharjee u la ai khublei ïa une u rangïalehkai (wicketkeeper-batsman) halor kane ka jingjop ha ka jingpule jong u. “Nga la ïohi ïa u Dipankar ba u ïalehkai kriket naduh ba u dangrit bad u la pyni ïa ka sap jong u ha ka shlem ai jinghikai jong ngi naduh kaba sdang bad hadien pat ka jingtrei shitom bad ka jinglong ba shisha jong u hi ka la ïalam ïa u shakhmat,” la ong u Bhattacharjee.
U Dipankar u la mihkhmat nyngkong ïa ka jylla ha ka U-16 shwa ban kiew sha ka kynhun ïalehkai U-19, kaba u la long kapten ha ka samoi ïalehkai 2024-25.
“Ka jingaiti met bad mynsiem ryngkat ka jinglong ryntih jong u ka la paw ha ka rta kaba dangkhynnah. Kam long kaba phylla ba un long uba paw ha ka jingïalehkai kriket bad ha ka jingpule bad nga ngeit skhem ba un dangjop bad ïoh ïa ka burom ha baroh ar ki bynta,” bynrap biang u Bhattacharjee.
“Kane ka dei ka jinglah ban bate ha baroh arliang. Ka jingai khublei jong nga ïa u Dipankar uba la ïoh ïa ka kyrdan ba lai ha ka eksamin HSSLC bad ka jingkyrkhu kyrdoh ïa ka lawei ka jong u.”
