Mawkyrwat, Jymmang 05
Ka District Commerce & Industries Centre (DCIC) kaba don ha Mawsynram, East Khasi Hills District kaba dei kawei na ki Training Centre kaba ai jinghikai ïa ki samla ha ki kam bapher bapher kum ka kam suhjaiñ, ka la treikam biang hadien ba la katto-katne kam shym la treikam.
Kane ka jingsdang ban treikam biang jong kane ka ophis ka long hadien ba ka Federation of Khasi & Jaiñtia and Garo People (FKJGP) South East Khasi Border Circle ka la leit ban jurip ïa kane ka ophis ha kine ki khyndiat bnai ba la dep.
Katkum ka kyrwoh khubor na u samla Kyrmen Shangdiar, President u la ong ba ka seng ka ai khublei kyrpang ïa kane ka ophis kaba la shimkhia ban pynlong biang ïa ki jingai jinghikai bapher bapher na ka bynta ka jingmyntoi ki khun samla kane ka dong ka thaiñ khamtam ïa kito ki samla kiba kwah ban seng kam lajong.
Shuh shuh ka seng ha katei kajuh ka sngi ka la leit ban ïakynduh ïa u nongai jinghikai bad ïa ki samla kiba shah hikai suhjaiñ ban ai mynsiem bad ban pynshlur ïa ki bad ka seng ka la kyntu ruh ïa ka ophis DCIC ba kam dei ban sangeh hynrei ban bteng beit ban pynlong ïa ki jingai jinghikai nangne shakhmat.
