Nongpoh, Jymmang 05
Ki Nongïalam jong ka Managing Committee ka Umsning Town Durbar Secondary School kaba don ha Umsning Proper A, ha ka Lah Sngi U Blei ki la leit ban ujor da ka ejahar (FIR) ha thanat Umsning halor ka jingsuba donkti ki runar bym lah ban ithuh, kiba la leit ban thang ïa ka ïing skul ha ka miet jong ka 4 tarik mynta u bnai.
U Chairman jong ka Managing Committee, Bah Angelstar Khonghat, u la ïathuh ba kane ka jingjia, ka dei ha ka por kumba 11:30 baje mynmiet, ha kaba ka la don ka jingklang jong ka ding ha katei ka ïing skul kaba la ïohi nyngkong da ki paidbah nongshong shnong bad pyntip sha ki nongïalam shnong, kiba la ïa mih ruh khlem da pynslem ban pynlip ïa katei ka ding bad pyntip ba ha kane ka jingjia, kawei na ki kamra klas ka la ingkhong khait.
U Bah Angelstar Khonghat uba dei ruh ha kajuh ka por u Rangbah Shnong jong ka Umsning Proper A, u la ïathuh ruh ba mynshwa ki la ju don teng ki jingjia ki barit bad kum ka shnong kam shym la ai jingujor satia ïa ki. Ha kane ka kynti kaba mynta kim banse shuh ban ujor ejahar sha ki pulit na ka bynta ban thwet bad pynshitom ïa ki runar kiba la pyndonkam da ka jaiñ sop miej bad plastic ban thang ïa ka ïing skul.
U la ïathuh ruh ba na ka liang ka Managing Committee ka la shim rai ban ai shuti shwa shi sngi ïa ki khynnah pule khnang yn lah ban pynbiang bad pynbha shwa ïa ki tiar kiba la ing, khamtam kum ki ben bad miej kiba hap pyndonkam da ki khynnah skul.
Na ka liang jong ka Kong B.L Nonglait, Headmistress jong ka Umsning Town Durbar Secondary School ka la pynpaw ïa ka jingpynrem jur halor kane ka jingjia kaba la wan jia khlem poi pyrkhat ha ka miet Sngi U Blei khamtam kum ha ka jaka pule bad kyntu ruh ïa ki paidbah nongshong shnong ba kin long kiba peitngor nangne shakhmat, khnang ba yn lah ban teh lakam ïa kum kine ki kam sniew hapoh ka shnong ka thaw.
