Nongpoh, Jymmang 05
Ki nonghikai bad khynnah skul jong ka St. Paul’s Higher Secon-dary School, Nongpoh, da ka jingsngew sarong ha ka Lah Sngi U Blei ki la pdiang burom ïa ka samla Nelly Mary Khymdeit kaba la ïoh ïa ka kyrdan kaba ar ha ka Top-10 jong ka resol Higher Secondary
School Leaving Certificate (HSSLC) ha ka Arts kaba la pynbna da ka Meghalaya Board of School Education (MBOSE).
Ka samla Nelly Mary Khymdeit ka la ïoh ïa katei ka kyrdan ryngkat 451 marks bad ïoh distinction ruh san tylli ki sobjek ba kynthup ïa ka English, Khasi, Sociology, Home Science bad Political Science.
Kum ban shu kdew, ka samla Nelly ka dei ka khun ba khatduh jong ka Kong Sabina Khymdeit bad u Bah Dominic Ral Dkhar (bam kwai ha dwar u blei) napdeng ki khatwei ngut shipara bad ki dei kiba shong ba sah ha ka shnong Saiden, Ri Bhoi District.
Haba ïoh ban ïakren bad ka samla Nelly, ka la pynpaw ïa ka jingainguh nyngkong ïa U Blei uba la ieid bad kyrkhu ba kan ïoh ïa ka resol kaba kam shym la poi pyrkhat satia ba kan ïoh ïa ka kyrdan kaba ar ha ka Top-10 wat lada ka don ïa ka thong ban poi ha kane ka thup.
Ka la ïathuh ba nyngkong, kam da shimkhia bha ïa ka jingpule, hynrei ynda haba ka ïohi ïa ka jingangnud bad ka jingthrang jong ki bahaïing hasem bad na ka skul ruh kumjuh, kala pynlong ïa ka ban puson bad pyrkhat ba lada kam lah ban leh bha, kan pynsngewsih ïa ki bahaïing bad ha skul ruh kumjuh bad dei hangta ba ka la sdang ban pynlut bun ïa ka por ban pule minot ha ki kot ki sla.
Ka samla Nelly ka la ai jingmut ruh ïa la ki para samla pule ba nyngkong nyngshap eh ki dei ban buh ïa ka thong bad ryngkat bad ka thong, ka dei ban don ruh ka jingtrei shitom khnang ba kin ïoh ban kheit ïa u soh uba thiang da kaba ai nuksa ruh ba ka jingminot bad jingtrei shitom ka dei ban long manla ka sngi, ym ban leh shi sien leh tang ynda la jan ka eksamin.
Ka la ïathuh ruh kumba la ïoh ban leit ïashim bynta ha ki jingïakop bapher bapher ym tang ha ka jylla, hynrei wat shabar jylla ruh, kaei kaba la pynpyrkhat ïa ka, ka long ba ki khynnah pule sha ri thor ki long kiba minot haduh katta katta la ïanujor bad ki samla pule ha kane ka jylla.
Ha kaba ïadei bad ka jingthrang lashai lashisngi, ka samla Nelly, kala pynpaw ba ka don ïa ka jingthmu ban pyndep ïa ka kyrdan pule haduh Master Degree bad ruh ban pyndep ïa ka PhD bad ban long kum kawei na ki nonghikai lane kata ka professor ha ki kolej.
Katba ka Principal ka St. Paul’s Higher Secondary School, ka Sr. Anjellina Ch Marak kala pynpaw ïa ka jingsngewkmen halor ka jinglah jong ka samla Nelly Mary Khymdeit ban ïoh ïa kane ka kyrdan kaba long ka burom kaba khraw ïa ka skul bad ka thaiñ hi baroh kawei.
Ka la ïathuh ruh ba ka samla Nelly Mary Khymdeit ka dei kaba trei shitom bad na ka liang jong ki nonghikai ruh ki ju ai ka jingïaroh ïa ka, halor ka jingtrei minot bad ka jinglen lade ka jong ka ban leh bha ha ka jingpule bad ai ruh ka jingkitbok kitrwiang ba kan nang lah shuh shuh ban leh bha ha ki jingpule kiba kham shalor bad poi sha ka thong kaba ka angnud.
Haba ïakren pat bad u hynmen jong ka samla Nelly Mary Khymdeit, u samla Bonifast Khymdeit u la pynpaw ïa ka jingkmen ba ka para ka jong u, ka la ïoh ïa katei ka kyrdan bad pynpaw ba kum uwei na ki nonghikai barim kane ka skul St. Paul’s bad uba la hikai mynta ha Mawrong Government Upper Primary School, u don ka jingkyntu ïa kiwei pat ki khynnah pule ba ki dei ban don ïa ka jingthrang bad ryngkat bad ka jingkohnguh sneng namar kum ki nonghikai, ki ju ïaleh ban ïarap bad kyntiew ïa la ki khynnah kiba ki hikai ba kin poi sha ka thong bad pynpaw ruh ba ki khynnah hi nalade kim don ïa ka jingkwah ban kiew shaphrang, ka shem jingeh ruh ïa ki nonghikai.
