Shillong, Jymmang 05
U Chief Electoral Officer (CEO) ka Jylla, Dr. B.D.R Tiwari u la ong ba ka jingpynïasoh ïa ka dur thep vote ne EPIC bad u Aadhaar haduh mynta ka shong beit ha ka mon jong ki paidbah.
“Katkum ba ka aiñ ka shah na ka hukum ba la pynmih da ka Supreme Court, ba ka jingpynïasoh ïa ka EPIC bad u Aadhaar ka dei beit ha ka mon ki paidbah,” la ong u Dr. Tiwari haba kren bad ki lad pathai khubor ha ka Lah Sngi U Blei.
U la ong, “Namar ïa u Aadhaar la pynïasoh bad kiwei-kiwei ki bynta/kam, ngi ruh ngi kyrpad lang ïa ki paidbah nongthep vote, ki lah ban pynïasoh lane ki dei ban pynïasoh ïa ka EPIC bad u Aadhaar. Hynrei, haduh mynta kane ka dei kaba lah ban jied bad ka shong ha ki paidbah bad ïa kane ki lah ban leh lyngba ki ERO (Elector Registration Officer’s).”
Ha kaba ïadei bad ka jingdon ki Electors Photo Identity Cards (EPIC) ba dei ujuh u EPIC nombar ha ar ngut ki briew, u Dr. Tiwari u la pyntip ba ka tnat ka la lap ba ki don 524 tylli kiba kum kine ha Meghalaya.
U la ïathuh ba ïa baroh 524 tylli la ailad biang da uwei pat u EPIC nombar.
“Kane ka dei ka kam ka long haba ujuh u EPIC nombar la lap ruh ha kawei ka Jylla, kaba mut ba ka dei kajuh ka EPIC tangba ki briew dei ar ngut. Ïa kane la pynbeit, bad hapoh ka jingkhmih jong ka Election Commission of India la bishar lut nadong-shadong ha kaba la ithuh lut ïa ki EPIC ba dei kajuh-kajuh bad la ai noh pat da uwei u nombar,” la ong u CEO.
Haba kylli, u la ong ba kine ki 524 tylli ki EPIC kiba dei kajuh-kajuh ki dei beit haba ïadei bad kiwei ki Jylla, katba ïa kiba dei tang ha Meghalaya bad kiba don EPIC ha ar tylli ki konstitwensi, ka State Election Commission ka pynbeit hi dalade.
“Hapoh ka Jylla ngi pynbeit hi ma ngi, ngi wad ba ujuh u EPIC nombar um dei ban don ar ngut ki briew. Ha ka EPIC card, lada la pyndonkam da u EPIC nombar thymmai, la kdew ruh ïa u EPIC nombar barim, bad batai ba la ai ïa ka EPIC hadien ba la leh katkum ki kyndon ,” la ong u Dr. Tiwari.
