Jowai, Jymmang 05
Ka jingïoh nam Top-10 jong kano-kano ne uno-uno khynnah skul ha ka eksamin ba la pynlong da ka Meghalaya Board of School Education (MBO-SE) ka long ka nam ka burom ym tang ïa u ne ka khynnah skul hynrei ïa ka skul ne jaka pule ruh.
Hynrei mynta ka kynti ka MBOSE ka la pynduh ïa ka nam ka burom jong kawei ka skul kaba la pynmih ïa kawei khynnah pule ha ka thup Top-10 jong ka Commerce Stream jong ka HSSLC.
Kane ka khynnah pule ka dei ka Sophia Niang kaba don ïa u Roll Number 326092. Ka la ïoh ïa ka kyrdan ba hynriew ha ka thup Top Ten jong ka Commerce bad ka MBOSE ka la pynithuh ïa ka kum ka khynnah Regular -II kaba long kumba ïuh tdong bseiñ ïa ki nonghikai kane ka skul namar ha ka jingshisha ka dei ka khynnah skul jong ka Government Girls Higher Secondary School, Jowai.
Ka principal ka skul Dr. Waisa Sumer haba kren sha ki lad pathai khubor ka la pynpaw ka jingsngewkhia namar mynta u snem ka dei ka jingdap 50 snem jong ka skul, bad ka jingjop jong ka Sophia ka la long ka mawjam ba kongsan.
“Ngi sngew sarong ïa ka jingjop jong ka Sophia, hynrei ka jingbym paw ka kyrteng jong ka skul ha ka thup Top-10, ka la pynsngewsih ïa baroh, bad haba ngi pyrshang ban ïakren bad ka MBOSE, ka pyntip ïa ngi ba ka skul kam pat pynïasoh ne Affiliation ïalade bad ka MBOSE bad kumta ym lah ban pynpaw ïa ka kyrteng jong ka skul,” ong ka Principal ka skul ka Dr. Waisa Sumer.
Halor ka jingjubab jong ka MBOSE, ka Dr Sumer ka la ong, “Ngi phylla namar ngi dei ka skul Sorkar kumno ki don jingthut halor ka Affiliation artad ban sdang ïa ka Commerce Stream hapoh kane ka skul la pynbor bad ai jingbit hi da ka DSEO lane tnat pule puthi, bad ha ka jingshisha ki la dei ban ong shwa lada dei ban leh da ka skul, hynrei ki khlem ong eiei.
Haba ïathuh ïa ka jinglong jingman jong ka Sophia Niang, ka Dr. Sumer ka la ong ba ka Sophia Niang ka la wan pule ha kane skul naduh klas VIII bad ka long ka khynnah kaba shimkhia ïa la ka jingpule bad lada don kino-kino ki prokram ne ki jingïakhun ne competition ka ju leit mihkhmat na bynta ka skul.
Ka Dr. Sumer ka la ïathuh ruh ba “Ha u snem ba la dep ka Sophia ka la ïakhun ïa ka Prerana Utsav bad ka skul jong ngi ka la ïoh ïa kyrdan ba nyngkong ha West Jaiñtia Hills District bad ka Sophia ka la ïohlad ban leit mihkhmat ïa ka jylla sha Gujarat.” Ka Principal ka la ïathuh ba ka Sophia ka duna tang kumba 10 marks ban ïoh rung ha ka Top-20 list jong ka SSLC hynrei na ka daw ba ka wan na ka longïing bym da bit da biang. Kumta kam shym la jied ïa ka Science hynrei ka la bteng ïa ka jingpule ha ka Commerce bad ha kajuh ka skul.
Ka Sophia Niang ka la ïoh Distinction ha ka sobjek English, Khasi, Economic, Business Studies, bad Accountancy.
Ka Sophia Niang ka dei ka khun ba nyngkong napdeng lai ngut shipara jong ka Kong Anisha Niang bad Ma Embok Khongbuh na ka shnong Huroi, East Jaiñtia Hills District bad ka shong ka sah ha Lumpariat, Jowai.
Halor kane ka jingjop, ka Sophia Niang ka pynpaw ka jingsngewnguh nyngkong ïa U Blei, ki kmie ki kpa, ki bahaïing bahasem khamtam ki nonghikai kiba la kyrshan ïa ka haduh ba ka la poi haduh kane ka kyrdan.
Haba kren ai mynsiem, ka Sophia Niang ka kyntu ïa ki khynnah pule ban pynleit jingmut bha ha ka pule ka puthi namar ban jop shisha, donkam ban sngewthuh ïa ka jingmut, kata kaba ïarap ïa nga,” ka la ong.
