Jowai, Jymmang 05
Ka Ummulong Cricket Club ka la ïai bteng ban ïoh jingjop ha ka District Cricket League ba la pynïaid da ka West Jaiñtia Hills District Cricket Association (WJHDCA), hadien ba ka la pynliem noh ïa ka Young Lad’s CC da 6 wiket ha ka jingïalehkai ha ka Pool-B ha ka sngi Saitjaiñ ha madan Khliehtyrshi.
Ka Ummulong hadien ba jop kynting pisa ka la ailad shwa ïa ka Young Lad’s ban tied nyngkong ha kaba ka la ïoh tang 110 run bad shah pynhap 7 wiket ha ka 20 over. U kapten kane ka kynhun u Dathrangki Pariat u la tied 46 run na ka 46 bol ryngkat bad saw tylli ki ‘four’ bad kawei ka ‘six’. U Eshan Siangshai u la ïoh 19 run. Katba u Wellmanson Passah bad u Heimon Lyngdoh ki la shim mar 2 wiket na ka bynta ka Ummulong.
Haba wan shimti ïa ka pali kaba ar, ka Ummulong ka la lah ban kynjoh sha ka thong da kaba ka la tied 111 run bad shah pynhap 4 wiket. U Aaron Lamare u la tied 48 run na ka 38 bol kynthup ïa hynriew tylli ki ‘four’ bad ar tylli ki ‘six’. Kumjuh u Heimon ïoh 22 run. Katba u Maremdor Sutnga u la shim 2 wiket na ka bynta ka Young Lad.
Haba phai sha ka miej ïakheiñ point, ka Ummulong ka la don ha ka kyrdan ba hakhlieh duh jong ka Pool-B da kaba ïoh 10 point na ki hynriew sien ïakhun da kaba jop saw sien bad ïakhaid ar sien. Ka Mowkaiaw CYC ka la wan ba-ar da kaba ka la ïoh 6 point na ki saw sien ïakhun, bud sa ka Phramer CC (5 point), Young Lad’s (5 point). Khliehtyrshi SC (3 point), katba ka Moodymmai SC (2 point) bad Evergreen Mukhla Mission (1 point).
Ha Pool-A, West Jaiñtia Police CC ka la tam ïa kiwei pat da kaba ka la ïoh 8 point na ka san sien ïakhun, bud sa ka Lion S&YA bad Mupliang SC mar 6 point. Ka Northeast A.U (ATS), Khimusniang SC and Evergreen SC & CC ki la ïoh mar 2 point.
