Tura, Jymmang 05
Kum shi bynta ban pynkhlaiñ ïa ki lad jingsumar hapoh ka Jylla, ka Sorkar ka la pyllait ïa ka Meghalaya Health Advancement Policy (MHAP).
Ka jingthmu ba hakhmat jong kane ka sienjam ka long ba ki ‘hospital’ (non-profit) kiba don ha ka Jylla kin ïoh ïa ka jingkyrshan pisa kaba mar T.2 klur.
Ïa kane ka skhim la pyllait ha ka Lah Sngi U Blei, ha kaba u Myntri Rangbah ka Jylla, Conrad K. Sangma u la aiti ïa ka sien siew ka banyngkong kaba long mar T.1 klur sha ka Tura Christian Hospital bad ka Holy Cross Hospital, Tura.
“Ngin sa kyrshan ïa san tylli ki ‘hospital’ (non-profit) ha kylleng ka Jylla hapoh kane ka polisi da kaba ai ïa ka jingïarap pisa ban pynbha ïa ki jingdon-jingem jong ki,” ong u Myntri Rangbah ka Jylla.
U la pynpaw ruh ba ïa ka pisa lah ban pyndonkam da ki ‘hospital’ ban pynbha ïa ki jingdon-jingem ba kongsan, ban shna shuh ïa ki kamra, ban thied tiar, nalor kiwei-kiwei.
“Kane ka jingkyrshan ka dei ka dak jong ka jingsngewnguh bad ka sienjam na bynta ka jingai jingsumar kaba neh,” u la bynrap.
U la pyntip ruh ba ïa ka sien siew kaba ar yn sa pyllait da ka tnad ka Koit ka Khiah ynda la aiti ïa ka ‘Utilization Certificate’ na bynta ka sien siew ka banyngkong.
Haba ïaroh ïa ki ‘hospital’ ba la pynïaid da ki mishonari bad ki kynhun ai jingïarap hapoh ka Jylla, u la ong ba ka jingkyrshan ka Sorkar ka long ka dak jong ka jingsngewnguh ïa ki jingshakri ba la ai da kine ki shlem jingsumar.
“Kam dei tang ka jingkyrshan pisa; ka dei ka jingai khublei kaba shisha jong ngi. Bunsien, ngim ju ïohi ïa ka jingshakri ba khlem sangeh jong ki nongtrei ka koit ka khiah, ki ‘Sister’, ki doktor, bad ki nongpynïaid ‘hospital’ jong ngi. Mynta ka sngi, nga kwah ban ai khublei kyrpang ïa phi iwei-pa-iwei na bynta ka jingkylla kaba phi la wanrah ha ka jingim jong ki briew jong ngi,” u la bynrap.
Nalor ki ‘hospital’ kiba don ha Tura, ïa kane ka jingïarap pisa yn sa mang ruh na ka bynta ki ‘hospital’ kiba don ha Jowai bad Shillong.
“Ka Sorkar ka shimkhia ban kyrshan ïa ki ‘hospital’ kiba la noh synñiang ha ka histori sha ka jingshakri ïa ka imlang-sahlang bad ka jingpynpoi ïa ka jingsumar sha kiba donkam, khamtam ha ki thaiñ kiba dang duna ka jingshakri,” u la ong.
