Shillong, Jymmang 05
Ka Meghalaya Board of School Education (MBoSE) ha ka Lah Sngi U Blei ka la pynbna ïa ka risol jong ka Higher Secondary School Lea-ving Certificate (HSS-LC) ha ka laiñ pule ‘Arts’, ‘Science’ bad ‘Commerce’.
Haba phai sha ka risol mynta u snem, kiba bun na kito kiba wan ha ka thup kyrdan ‘Top Ten’ ha baroh 3 tylli ki laiñ pule – ‘Arts’, ‘Science’ bad ‘Commerce’, ki dei na ki shlem pule kiba don ha ki jaka sor ba kynthup ïa ka St. Edmund’s Higher Sec. School, Shillong, Laban Bengalee Boys’ Hr. Sec. School, Shillong, St. Anthony’s Higher Sec. School, Shillong nalor kiwei.
Ha ka laiñ pule ‘Arts’, ïa ka kyrdan banyngkong, la ïasam hapdeng ki ar ngut – Albert Mate bad Idawanplishisha Swer kiba la ïoh mar 455 ‘marks’. Kine baroh ar ngut ki dei na St. Edmund’s Higher Sec. School, Shillong.
Ha ka laiñ pule ‘Science’, ka kyrdan banyngkong ka la leit sha u Saptarshi Bhattacharjee na Laban Bengalee Boys’ Hr. Sec. School, Shillong uba la ïoh 483 ‘marks’.
Haba phai pat sha ka laiñ pule ‘Commerce’, ka Disha Chokhani na St. Anthony’s Higher Sec. School, Shillong ka la ïoh bat ïa ka kyrdan banyngkong. Ka Chokhani ka la ïoh 481 ‘marks’.
Baroh ki don 29, 278 ngut ki khynnah pule kiba la ïakhun ïa ka eksamin HSSLC mynta u snem ba kynthup ïa 22,835 ngut ha ka laiñ pule ‘Arts’, 3,922 ngut ha ka ‘Science’, 2,501 ngut ha ka ‘Commerce’ bad 20 ngut ha ka ‘Vocational’.
Na kine baroh, 18,736 ngut ki la ‘pass’ ha ka ‘Arts’ (82.05%), 3,253 ngut ha ka ‘Science’ (82.94%), 2,033 ngut ha ka ‘Commerce’ (81.28%), bad 17 ngut pat kiba la ‘pass’ ha ka laiñ pule ‘Vocational’ (85%).
“Ka jingpynïaid ïa ka eksamin ka la long kaba ïaid beit ïaid ryntih ha ryngkat ka jingïatreilang bad ka tnad pule-puthi, ki bor pynïaid distrik, ka tnad pulit, ki khlieh jong ki shlem pule bad khamtam ki nonghikai kiba la trei shitom na bynta kane ka eksamin,” ong u Executive Chairman ka MBoSE, Tura, u C.P. Marak, IFS (Retd).
U la ong ruh ba ka jingminot lang jong baroh ka la synñiang ha ka ban pynlong ïa ka eksamin kaba jop.
“Ngi ai khublei ïa ka jingnoh synñiang jong ki skul bapher-bapher ha ka ban ai jinghikai ïa ki khynnah pule jong ki, kiba wan na ki bynta bapher-bapher. Ki nonghikai kiba la tip kum ki nongtei ïa ka lawei jong ka ri ki la pynlah ïa ki khynnah jong ki ban ai ïa kaba paka tam kumjuh ban seisoh ha kane ka eksamin,” u la ong.
Kum ban shu kdew hangne, ïa ka risol la pynbna kham kloi mynta u snem haba ïa nujor bad ki snem ba la dep namar ka sienjam ‘digital’ bathymmai kaba la pdiang da ka Board.
