Shillong, Jymmang 05
Ka Khasi Students’ Union (KSU) ka la rai ban pynsangeh shwa shipor ïa ka jingïakhih shong kyllaiñ mungor hakhmat ka Administrative Block jong ka North Eastern Indira Gandhi Regional Institute of Health and Medical Sciences (NEIGRIHMS), hadien ka jingtuklar jong ka Sorkar Jylla ha ka Lah Sngi U Blei, ha kaba na ka liang ki bor pynïaid ka NEIGRIHMS ruh ki la kohnguh ban pynsangeh noh shwa ïa ka jingthung kam hapoh ka Institute tat haduh ban da pynbeit ïa ki mat kiba ïadei bad ki jingdawa jong ka KSU.
Haba pynbna ïa kane ka rai, u President ka KSU, Bah Lambokstarwell Marngar u la ong ba hadien ka jingïalang ba la khot da ka Sorkar, ka KSU ka la shim rai ba lashai ka sngi ka seng kan wan biang sha NEIGRIHMS ban ïakren halor ki mat kiba kane Institute ka lah ban pynbeit mar-mar.
Na ka liang u Chairman ka Employment Cell ka KSU, Bah Reuben Najiar u la ong ba ka seng ka la rai ban pynsangeh shwa shipor ïa ka jingïakhih jong ka namar ba ka hap ban bishar ïa ki katto-katne ki kot ki sla ba donkam halor ki mat jingdawa.
“Kam long kaba ïahap ïa ngi ban don hangne namar ka kam ka dang ïaid hapdeng ka jingbishar bniah,” u la ong.
Na ka liang u Bah Reuben u la maham ba ka jingïakhih jong ka seng kan sdang biang lada ki bor ka NEIGRIHMS kim lah ban pynurlong ïa ki jingdawa ha ki sngi ban wan.
U la ong ba ha ka jingïalang ba la khot da ka Sorkar ym shym la lah ban ïakren pynbeit lut ïa ki mat namar ki don ki mat kiba lah ban pynbeit da ka NEIGRIHMS bad ki don katto-katne ki mat kiba hap shim khia da Governing Council bad ka tnat Ministry of Health & Family Welfare ka Sorkar Pdeng, khamtam ha kaba ïadei bad ka jingbhah kyrpang na ka bynta ki Schedule Tribe nalor kiwei-kiwei ki mat.
U Bah Reuben u la pyntip ba ka KSU ka la rah ïa ka mat jong ka rta thep kam ha katei ka jaka sumar, ha kaba u la ong ba ka jingpynhiar kynsan ïa ka rta na ka 35 sha ka 30 snem kan wanrah jingeh kaba khraw ïa kiba thep kam, khamtam ba ha ki snem ba la dep kiba bun kim shym la lah ban thep namar ka jingwan ka khlam Covid.
Haba ïadei bad ka jingbhah ba 80:20 ïa ki kynthei bad shynrang ha ka kam nos, u la ong ba ha kaba sdang ka NEIGRIHMS ka la pynpaw ba ka dei ka rai jong ka Ministry, hynrei ka la pynpaw pat ba ka NEIGRIHMS ka don la ka jong ka Governing Council ba don lang ki dkhot na ka Sorkar Pdeng, bad ka Governing Council ka lah ban shim ïa ka rai ban pynbeit ïa kane ka jingeh.
