Rah nam lahduh ka Mawlarshong SC ha ka NDSA Super Division

Dei ha ka jingïashut tie-breaker ba ka Mawlarshong ka la tam da 4-2 kol ïa ka liang pyrshah bad ban kynjoh sha ka thong jong ka jingjop. 

Nongstoiñ, Jymmang 05

Ka Mawlarshong Sports Club ka la long ka lahduh ha ka Super Division jong ka NDSA Premier League Football Tournament 2024-25, hadien ba ka la lah ban pynliem noh ïa ka Pyndengrei SCSC lyngba ka tie-breaker da 4-2 kol ha ka Lah Sngi U Blei ha madan New Nongstoiñ.

Ïa ka nam Best Goalkeeper la ïohpdiang da u Teibok Lyngkhoi na ka Mawlarshong SC, Best Player ka leit sha u Rishan Khardewsaw na ka Nongstoiñ FT, bad ïa ka Top Scorer la ïohpdiang da u Silvester Thongni na ka Pyndengrei SC bad Emerging Player la khur da u Amosli Nongbri na ka Mawkawah SC.

Kumba ka paw kane ka jingïakhun final ka la long kaba itynnad bad kaba ïakhaid bha ha kaba baroh ar kynhun ki la pyrshang ban ïakhun tyngeh naduh kaba sdang. Haduh kaba kut kine ki kynhun kim shym la lah ban thep kol. Dei ha ka jingïashut tie-breaker ba ka Mawlarshong ka la tam da 4-2 kol ïa ka liang pyrshah bad ban kynjoh sha ka thong jong ka jingjop. 

Ïa ki khusnam sha kine ki kynhun la sam da u MLA ka Nongstoiñ, Bah Gabriel Wahlang kum kongsan ha ka jingdonlang ruh u President ka Meghalaya Football Association (MFA), Bah Hamletson Dohling kum symbud kongsan, u Bah Y.G. Lyngdoh, Working President ka Mawkyrwat District Sports Association, u MLA barim ka Nongstoiñ Bah Macmillan Byrsat, Bah B.S. Kharlor President ka NDSA, Bah Mt. Gordon, General secretary ka NDSA , Bah G.J.L. Sangriang dkhot jong ka Football Committee, Bah C.P. Mawkon, ADC ka West Khasi Hills, ki dkhot ka NDSA, ki nongïalam Shnong bad kiwei kiwei.